निष्पक्ष र विश्वसनीय खबरको सँगालो 
Khabar Punja
२२ चैत्र २०८१, आईतवार
दमौली ।केही दिन अगाडी सडक भासिएपछि दमौली-केशवटार मार्ग अवरुद्ध भएको छ । व्यास नगरपालिका-१३ बेलबासमा सडक भासिएपछि उक्त मार्ग पूर्ण रुपमा अवरद्ध भएको हो ।
मोटरसाइकल अप्ठ्यारोका साथ सञ्चालन गर्न मिलेपनि अन्य सवारी सञ्चालन गर्न सक्ने अवस्था रहेको छैन । सडक भासिएर उक्त स्थानमा यातायात सञ्चालन नभएपछि व्यास नगरपालिका- १३ को गुँदी,बेनीकोट, पोखरी भन्ज्याङ्, व्यास नगरपालिका-१४ को केशवटार, रुम्सी, हर्कपुर, ठिन, नयाँगाउँ तथा बन्दीपुर गाउँपालिका ३ को सुखौरा तथा धरमपानीबाट आउने सवारी साधनहरु भासिएको स्थान भन्दा पर नै रोकिन बाध्य भएका छन् । त्यहाँबाट यात्रुहरु झरेर पैदल दमौली आउन बाध्य हुनु परेको केशवटारका लेखबहादुर
थापाले बताउनुभयो ।
दिन दिनै पानी पर्दा सडकमा झन ठूलो खाल्डो पर्दै गएको र समयमै
पुननिर्माणको काम शुरु नगर्ने हो भने त्यसले ठुलो समस्या निम्त्याउन सक्ने थापाले बताउनुभयो । यात्रुहरु हिडेर वारपार गरेपनि सडक अवरुद्ध हुँदा खाद्यान्न र निर्माण सम्बन्धि सामाग्री ढुवानीमा समस्या परेको छ । उक्त सडक जतिसक्दो चाँडो मर्मत गर्नु पर्ने भन्दै बन्दिपुर गाउँपालिका–३ सुखौरा घर भई हाल दमौलीमा होटल सन्चालन गर्दै आउनुभएका होटल व्यवसायी सङ्घ तनहुँका अध्यक्ष दुर्गाविलास भट्टराईले बताउनुभयो ।
