निष्पक्ष र विश्वसनीय खबरको सँगालो 
Khabar Punja
१४ मंसिर २०८१, शनिबार
काठमाडौ । कोरोना भाइरस (कोभिड-१९) को सङ्क्रमणबाट नेपालमा एकै दिन तीन जनाको मृत्यु भएको छ । पर्सामा दुई र काठमाडौंमा एक जनाको कोरोनाबाट मृत्यु भएको हो ।
यससँगै कोरोना सङ्क्रमणबाच नेपालमा मृत्यु हुनेको सङ्ख्या ६६ पुगेको छ । पछिल्लो दुई दिनमा मात्र ९ जनाको मृत्यु भएको छ ।
समुदाय स्तरमा सङ्क्रमण फैलिएको मानिएको पर्सामा कोरोनाबाट दुई जनाको मृत्यु भएको पुष्टि भएको छ । साउन २० गते राति आफ्नै घरमा मृत्यु भएका वीरगञ्ज-११ मुर्लीका ८० वर्षीय वृद्धमा कोरोना सङ्क्रमण पुष्टि भएको हो । मृत्युपछि नारायणी अस्पतालको प्रयोगशालाबाट गरिएको परीक्षणमा कोरोना सङ्क्रमण पुष्टि भएको अस्पतालका मेसु डा. मदन उपाध्यायले जानकारी दिनुभयो ।
यस्तै काठमाडौमा पनि कोरोना सङक्रमणका कारण एकजनाको मृत्यु भएको छ । ओम अस्पताल चाबहिलमा उपचारका क्रममा मृत्यु भएकी धनुषाको मिथिला नगरपालिका-१० लालगढकी ७२ वर्षीया महिलामा सङ्क्रमण पुष्टि भएको हो । दम, होइपोथाइरोडिजम र उच्च रत्तचापका विरामी उनलाई श्वासप्रश्वासमा समस्या हुनुका साथै पेट दुखेर धनुषाबाट ओममा ल्याइएको थियो । १७ गते आईसीयूमा भर्ना भएकी उनको उपचारका क्रममा बुधबार मृत्यु भएको अस्पताल स्रोतले जनाएको छ ।
