निष्पक्ष र विश्वसनीय खबरको सँगालो 
Khabar Punja
७ जेष्ठ २०८१, सोमबार
दुलेगाैडा : बेबारिसे कुुकुरको संख्यामा वृद्धि भएपछि बजार क्षेत्रमा होहल्ला हुने र टोकाईबाट रेबिज रोगको संक्रमण हुने जोखिम धेरैतिर छ । शुक्लागण्डकी नगरपालिकामा पनि यो समस्या बढ्न थालेपछि नियन्त्रणका लागि कुकुरको बन्ध्याकरण गरिएको छ ।
भेटेरीनरी अस्पताल तथा पशु सेवा विज्ञ केन्द्र तनहुँ र शुक्लागण्डकी नगरपालिका पशु सेवा शाखाको आयोजनामा शुक्रबार र शनिबार दुई दिन छाडा/सामुदायिक कुकुरलाई रेबिज बिरुद्धको खोप लगाइ बन्ध्याकरण गरिएको हो । नगरक्षेत्रभित्रको विभिन्न स्थानमा रहेका कुकुरलाई समात्दै शिविरमा ल्याएर बन्ध्याकरण गरिएको थियो ।
४५ कुकुरलाई रेबिज विरुद्धको खोप लगाइ बन्ध्याकरण गरेको शुक्लागण्डकी नगरपालिका पशु सेवा शाखाका कर्मचारी ईश्वर रेग्मीले जानकारी दिनुभयो । उहाँका अनुसार १३ वटा पोथी कुकुरको मिनिल्याप र ३२ वटा भाले कुुकुरको भ्यासेक्टोमी गरिएको हो ।
पञ्चमुनी देव मावि दुलेगौँडामा शिविर सञ्चालन भएको थियो । छाडा कुकुर र रेबिज नियन्त्रणको उपाय बन्ध्याकरण भएको भेटेरीनरी अस्पताल तथा पशु सेवा विज्ञ केन्द्र तनहुँका प्रमुख डा. बालकुमार श्रेष्ठले बताउनुभयो । “बन्ध्याकरण गरेपछि सन्तान उत्पादन हुँदैन र नियन्त्रण गर्न सकिन्छ । छाडा कुकुर कम भएपछि रेबिज संक्रमण फैलन रोक्छ,” उहाँले भन्नुभयो । शिविरमा ल्याएको कुकुरलाई जुकाको औषधी पनि दिएको डा.श्रेष्ठले बताउनुभयो ।
