Khabar Punja

तनहुँ : तनहुँको म्याग्दे गाउँपालिकास्थित जामुने स्वास्थ्यचौकी (कोभिड अस्पताल) मा पहिलो पटक एमबिबिएस डाक्टरको व्यवस्था गरिएको छ । केही समय अगाडी कोभिड अस्पतालको रुपमा स्तरोन्नति गरिएको स्वास्थ्यचौकीमा पहिलो पटक डाक्टरको व्यवस्था गरिएको हो ।

गाउँपालिकाले चिकित्सक नियुक्त गरी अस्पतालबाट सेवा शुभारम्भ गरिएको प्रमुख प्रशासकीय अधिकृत नारायणप्रसाद अधिकारीले जानकारी दिनुभयो । उहाँका अनुसार उक्त अस्पतालमा प्रयोगशाला समेत सञ्चालनमा आएको छ । उक्त प्रयोगशालाको बुधबार गाउँपालिकाका अध्यक्ष मायादेवी रानाले उद्घाटन गर्नुभयो । गाउँपालिकाका वासिन्दालाई सहज रुपमा स्वास्थ्य सेवा उपलब्ध गराउन गाउँपालिका प्रतिबद्ध रहेको अध्यक्ष रानाले बताउनुभयो ।

गाउँपालिकाले थर्पु स्वास्थ्य केन्द्रमा पनि प्रयोगशाला सञ्चालनमा ल्याएको छ । दुवै प्रयोगशालामा एक÷एक जना प्राविधिक नियुक्त गरिएको छ । प्रयोगशालाबाट दमौली पोखराभन्दा आधा शुल्कमा सेवा प्रवाह गरिनेछ । “स्थानीय स्तरमै सेवा दिन र अन्यत्र जानपर्ने बाध्यताको अन्त्य गर्नका लागि प्रयोगशाला सञ्चालनमा ल्याएका हौ,” प्रमुख प्रशासकीय अधिकृत अधिकारीले भन्नुभयो ।