निष्पक्ष र विश्वसनीय खबरको सँगालो 
Khabar Punja
१७ माघ २०८१, शुक्रबार
दमाैली : विश्वकै दुर्लभ रोगबाट ग्रसित ९ महिने बालक मोहम्मद उस्मान अली बचाउनका लागि दमौलीका मुस्लिम युवाहरुले सहयोग सङ्कलन अभियान शुरु गरेका छन् । शुक्लागण्डकी नगरपालिका–५ का उस्मान अली विश्वकै दुर्लभ रोग ‘स्पाइनल मस्कुलर एट्रोफी’ बाट ग्रसित छन् ।
यो रोगको उपचारका लागि ठूलो धनराशी आवश्यक पर्ने र परिवारको आर्थिक क्षमताले नभ्याउने भएपछि सहयोग सङ्कलन अभियान शुरु गरिएको मोहम्मद गफ्फार (सुदीप) ले जानकारी दिए । यसैक्रममा व्यास नगरपालिका–४ स्थित नुरी हन्फी जामे मस्जिदबाट शुक्रबार २५ हजार एक सय ५० सङ्कलन भएको छ ।
“आजबाटै दमौली बजारमा पनि सहयोग सङ्कलन शुरु गरेका छौ, सबैको साथ र सहयोगले ९ महिने बालकलाई बचाउन सकिन्छ,” उनले भने । ती बालकको उपचारका लागि सहयोग गर्न चाहनेले गफ्फारको मोवाइल नम्बर ९८१५१३४८३७ मा सम्पर्क गर्न सक्नेछन् ।
ती बालकमा जन्मिएको तीन महिनामै एसएमए रोगको लक्षण देखिएको परिवारले जनाएको छ । उस्मानका परिवारले उनलाई तीन महिनादेखिनै पोखराका विभिन्न अस्पतालमा उपचार गराएर परीक्षण गर्दा रोगको पत्ता नलागेपछि ८ महिनाको उमेरमा कान्ति बाल अस्पताल लगेका थिए । उक्त अस्पतालमा उस्मानको उपचार बाल रोग विशेषज्ञ डा. बिना प्रजापतीको निरीक्षणमा भएको थियो ।
झण्डै २५÷३० परीक्षणपछि बिरामीको रगत परीक्षणका लागि भारत लाल पाथ पठाउँदा उस्मानलाई ‘स्पाइनल मस्कुलर एट्रोफी’ रोग लागेको पत्ता लागेको हो । नोवार्टिस जिन थेरापिजले उत्पादन गर्ने उक्त औषधि प्रयोग गर्न सके बिरामीको ज्यान बचाउन सक्ने सल्लाह डा.मानन्धरले दिनुभएको छ ।
तर उक्त औषधि अन्य औषधि जस्तो सस्तो भने छैन । जोल्जेन्स्मा संसारकै महङ्गो औषधि हो । जोल्जेन्स्मा नामक औषधिलाई नेपाली रु २५ करोड भन्दा बढी पर्ने जनाइएको छ । यो रोग नेपालमा कमै मात्र पुष्टि हुने गरेको छ । उस्मान भन्दा पहिला यस प्रकारको रोग नेपालमा भैरहवाकी २२ महिने सियोना श्रेष्ठमा देखिएको थियो । हाल उनको दुबईमा उपचार भइरहेको छ ।
सर्वाधिकार सुरक्षित नोट : यस अनलाइनमा सम्प्रेषित कुनै पनि समाचार वा जानकारी सर्वाधिकार सुरक्षित गरिएको छ । ‘खबरपुञ्ज डटकम’बाट प्रेषित समाचार बिनाअनुमति प्रयाेग नगर्न सूचित गराइन्छ ।
