निष्पक्ष र विश्वसनीय खबरको सँगालो 
Khabar Punja
९ मंसिर २०८१, सोमबार
दमाैली । तनहुँको शुक्लागण्डकी नगरपालिका–४ दुलेगौडामा ट्याक्सी चालक घनश्याम सिग्देललाई कुटपिट गरी लुटपाट गर्ने एक व्यक्तिलाई प्रहरीले पक्राउ गरेको छ । पक्राउ पर्नेमा व्यास नगरपालिका–१० अधेरीभञ्ज्याङ बस्ने ३० वर्षीय दुर्गा बहादुर परियार रहेको जिल्ला प्रहरी कार्यालय तनहुँले जनाएको छ ।
परियारलाई गत फागुन १३ गते पोखरा महानगरपालिका–९ पृथ्वीचोकस्थित जानकी होटलमा लुकेर बसेको अवस्थामा पक्राउ गरेको प्रहरी नायब उपरिक्षक युवराज खड्काले जानकारी दिए । पक्राउ परेकाविरुद्ध आइतबार जिल्ला अदालत तनहुँबाट ज्यान मार्ने उद्योग तथा डाँका चोरी मुद्दा शीर्षकमा छ दिनको म्याद थप गरिएको छ ।
शुक्लागण्डकी नगरपालिका–९ बस्ने ट्याक्सी चालक सिग्देललाई गत फागुन १२ गते परियारले कुटपिट गरी लुटेका थिए । ट्याक्सी रिजर्भ गरी भानु नगरपालिका–१२ ओख्लेस्थित एकान्तस्थानमा लगेर लुटपाट गर्ने उद्देश्यले परियारले ट्याक्सी चालकको टाउकोमा ढुङ्गाले हानेका थिए ।
परियारले ट्याक्सी चालकको साथबाट नगद, मोवाइल तथा ट्याक्सी समेत लुटपाट गरी चालकको परिवारलाई फोन गरी फिरौती माग गर्दै आएका थिए । प्रहरीले भानु नगरपालिका–६ सिम्पानीस्थित कच्ची सडकमा ट्याक्सी फेला पारेका थियो ।
