निष्पक्ष र विश्वसनीय खबरको सँगालो 
Khabar Punja
१४ मंसिर २०८१, शनिबार
दमौली । व्यास नगरपालिका-१ भादगाउँस्थित दोभान युवा क्लवलाई पराजित गर्दै आयोजक अकला गाउँवेशी युवा क्लवले प्रथम अकला कप सेभेन ए साइड फुटबलको उपाधि जितेको छ।
म्याग्दे-१ गुणादीमा बिहीबार सम्पन्न फाइनल खेलमा दोभानलाई ट्राइबेकरमा पराजित गर्दै आयोजकले उपाधि जितेको हो । निर्धारित समयमा दुवै टिमबाट गोल हुन नसकेपछि खेल ट्राइबेकरमा पुगेको थियो । ट्राइबेकरमा अकला ८-७ ले विजयी भएको छ ।
उपाधिसँगै अकलाले एक लाख २२ हजार नगद र ट्रफी जितेको छ । उपविजेता दोभानले रु ६६ हजार ६ सय ६६ र ट्रफीमा चित्त बुझायो ।
विजेतालाई म्याग्दे गाउँपालिकाका अध्यक्ष श्रीप्रसाद श्रेष्ठले पुरस्कार वितरण गरे । सो अवसरमा उनले स्वस्थ जीवनका लागि खेलकुद आवश्यक भएको चर्चा गर्दै पालिकाले खेलकुदलाई प्राथमिकतामा राखेको बताए ।
नेपाली कांग्रेसका महाधिवेशन प्रतिनिधि मोहनकुमार श्रेष्ठले खेलाडीहरु विदेशिनुपर्ने बाध्यता रहेकाले खेलाडीलाई स्वदेशमै टिकाइराख्न योजना बनाउनुपर्ने बताए ।
कार्यक्रममा म्याग्दे-१ का अध्यक्ष मणिभद्र वाग्ले, कांग्रेस म्याग्देका सभापति रामभक्त घिमिरे, आदर्श नमूना क्लवका अध्यक्ष मलिन मल्ल लगायतले खेल क्षेत्रका बारेमा धारणा राखेका थिए ।
माघ २० देखि सञ्चालित प्रतियोगितामा ३४ टिमको सहभागिता रहेको खेल संयोजक सुरज थापाले जानकारी दिए ।
