निष्पक्ष र विश्वसनीय खबरको सँगालो 
Khabar Punja
१ कार्तिक २०८१, शुक्रबार
दमौली । तनहुँ-१ को प्रतिनिधिसभा सदस्यमा रास्वपाका डा. स्वर्णिम वाग्ले ३४ हजार ९ सय १९ मत प्राप्त गरी विजयी भए । पॉच दलीय गठबन्धनबाट नेपाली कांग्रेसका गोविन्द भट्टराईले २० हजार एक सय २२ मत ल्याए ।
मंसिर ४ मा रास्वपाका विकास सिग्देलले ६ हजार ३२ मत ल्याएका थिए । स्वर्णिमले अत्याधिक मत ल्याएर चुनाव जितेपछि उनले कुन पार्टीको बढी मत काटे भन्ने आम चासो रहेको छ।
स्वर्णिमले ल्याएको मतमा कांग्रेस र माओवादीको आ-आफ्नो दावी छ । पॉच दलीय गठबन्धनबाट उम्मेदवार बनेका भट्टराईले कांग्रेसको मत जोगाएको दावी कांग्रेसको छ । तर माओवादीले भने त्यो मतमा आफूहरुको पनि मत परेको दावी गरेको छ ।
नेपाली कांग्रेसका जिल्ला पूर्व सभापति एवं व्यासका मेयर वैकुण्ठ न्यौपानेले स्वर्णिमले एमालेको बढी मत काटेको विश्लेषण गरेका छन् । दमौलीबाट प्रकाशित हुने मादीसेती प्रवाह दैनिकमा बिहीबार प्रकाशित एक लेखमा न्यौपानेले स्वर्णिमले एमालेको ११ हजार ४ सय ५५ मत काटेको उल्लेख गरेका छन् ।
न्यौपानेका अनुसार स्वर्णिमले गोविन्दराज जोशीको ६८७८, कांग्रेस गठबन्धनको ५१९६ र राप्रपाको २२०० मत काटेको विश्लेषण गरेका छन् ।
एमाले नेता एकबहादुर रानाको विश्लेषण भने फरक छ । उनका अनुसार स्वर्णिमले एमालेको ८०००, कांग्रेसको ८०००, माओवादी केन्द्रको ५०००, गोविन्दराज जोशी समूहको ५४१९, राप्रपाको २५०० मत काटेको विश्लेषण गरेका छन् । साथै रास्वपाले आफ्नै ६००० मत ल्याएको रानाको विश्लेषण छ।
