निष्पक्ष र विश्वसनीय खबरको सँगालो 
Khabar Punja
२१ पुष २०८१, सोमबार
दमाैली । तनहुँकाे शुक्लागण्डकी नगरपालिका-९ घारीस्थित गाैसंरक्षण केन्द्रमा घाँस राेप्ने अभियानमा सर्वसाधारणकाे स्वतस्फुर्त सहभागिता भएकाे छ । सुशासन तथा समृद्ध शुक्लागण्डकीका लागि युवा अभियानकाे आव्हानमा उक्त कार्यमा श्रमदान गर्न सर्वसाधारणकाे उल्लेख्य सहभागिता रहेकाे हाे ।
अभियानका संयाेजक शङ्कर पन्तले गौ संरक्षण केन्द्र हराभरा र गाई भोकले मर्न नपर्ने समयसम्म घाँस राेप्ने कार्य चलिरहने बताए । उनले भने, ‘हामीले याे अभियानका लागि आव्हान गरेकामा युवायुवती, वृद्धवृद्धा समेत आएर सहयाेग गरिरहनुभएकाे छ ।’
यसअघि पाँचवटा श्रमदान कार्यक्रममा अनावश्यक झाडी फाड्ने, ढुङ्गा पन्छाउने, खनजोत गर्ने लगायतका सफाईको काम गरी घाँस रोप्ने जमिन तयार पारिएपछि असारको पहिलो हप्तादेखि बृहत घाँस रोपण सुरु भएकाे छ ।
शनिबार करिब २० रोपनी जग्गामा नेपियर, मुलाटो, सख्खर लगायतका भुईघाँस, दबदबे, पाखुरी, काउरो, इपीलिपी लगायतका डाले घाँस रोपिएको छ ।
बृहत सरसफाई तथा घाँस रोपण कार्यक्रमको छैटौं श्रृङ्खलामा युवा अभियन्ताहरुसँगै नेपाल प्रहरी, माछापुच्छ्रे टोल, गाछेपानी साँखर टोल, हरियाली आमा समूह, जनहित आमा समूह, पञ्चमुनिदेव माविका विद्यार्थी सहभागी थिए ।
