निष्पक्ष र विश्वसनीय खबरको सँगालो 
Khabar Punja
११ आश्विन २०८१, शनिबार
दमौली । पहिरोका कारण अवरुद्ध भएको पृथ्वीराजमार्ग अन्तर्गत तनहुँको छिर्कने–डुम्रे खण्ड सुचारु भएको छ । आज दिउँसो १२ः१५ देखि अवरुद्ध भएको उक्त खण्ड पहिरा पन्छाएपछि पुनः सुचारु भएको हो ।
बन्दीपुर गाउँपालिका–१ बेलभन्ज्याङमा खसेको पहिरोका कारण दुईतर्फी सडक अवरुद्ध भएको थियो । सडक डिभिजनको सहयोगमा पहिरो पन्छाएर राजमार्ग सुचारु भएको जिल्ला प्रहरी कार्यालय तनहुँले जनाएको छ । सडक सुचारु भएपछि रोकिएका सवारी साधनलाई गन्तव्यतर्फ पठाइएको छ ।
यसैगरी १७ घण्टादेखि एकतर्फी सञ्चालनमा रहेको पृथ्वीराजमार्ग अन्तर्गत आँबुखैरेनी–मुग्लिन खण्ड दुईतर्फी सञ्चालन भएको छ । आँबुखैरेनी गाउँपालिका–४ ऐनापहरा नजिक शनिबार साँझ ६ः३० बजे पहिरोसँगै ढुङ्गा खस्दा राजमार्ग एकतर्फी भएको हो ।
ढुङ्गा हटाएर शनिबार राति ९ बजे एकतर्फी बनाइएको सडक आज दिउँसोबाट दुईतर्फी सञ्चालनमा आएको प्रहरी नायब उपरिक्षक मोहनबहादुर खाँणले जानकारी दिए । “सडकमा रहेका ढुङ्गालाई ब्रेकरले फुटाएर सडक दुईतर्फी सञ्चालनमा ल्याएको छ,” उनले भने ।
