निष्पक्ष र विश्वसनीय खबरको सँगालो 
Khabar Punja
१४ मंसिर २०८१, शनिबार
दमाैली । बागलुङको पञ्चकोटमा फागुन ९ गतेदेखि २३ गतेसम्म हुने अनन्तश्री ब्रह्माण्डीय महायज्ञको प्रचारप्रसारका लागि हिँडेको कलशयात्रा व्यासभूमि दमौली आइपुगेको छ । सर्वसिद्धिधाम पञ्चकोटमा हुने महायज्ञमा राखिने स्वर्णमय धान्य श्रीस्तम्भ (मौलो) र महायज्ञको सङ्कल्पका लागि जल सङ्कलन गर्ने उद्धेश्यसहित कलशयात्रा मङ्गलबार व्यासभूमि दमौली आइपुगेको हो ।
दमौली आइपुगेको कलशयात्रालाई व्यास क्षेत्र विकास कोष, ब्राम्हण समाज नेपाल तनहुँ लगायतले स्वागत गरेको छ । व्यासका अध्येता काशीनाथ न्यौपाने, व्यासगुफाका संरक्षक दामोदर बाबा, ब्राम्हण समाजका पूर्व अध्यक्ष उपेन्द्र लम्साल लगायत भक्तजनको टोलीले कलशयात्रालाई स्वागत गरी व्यासगुफा पुर्याएकाे थियाे ।
महायज्ञका प्रवक्ता सुदर्शन प्रपन्नाचार्यका अनुसार माघ ७ गतेबाट सुरु गरिएको कलशयात्रा विभिन्न तीर्थस्थलमा पुगी जल सङ्कलन गरी पुनः महायज्ञस्थलमा फर्कनेछ ।
धार्मिकरुपमा पवित्र मुक्तिक्षेत्र, शालग्रामवाहिनी कालीगण्डकी किनारमा अवस्थित प्रसिद्ध पञ्चकोट धाममा मुक्तिनाथ पीठाधीश्वर स्वामी कमलनयानाचार्यको सङ्कल्पमा महायज्ञ हुँदैछ ।
ऐतिहासिक श्रीमहायज्ञमा २५ फिट अग्लो मौलोमा २१ हजार पाँच सय ५५ जना व्यक्तिबाट धान समर्पण गरिने जनाइएको छ । महायज्ञमा राष्ट्रसमुन्नतिका लागि विभिन्न विधाका राष्ट्रिय सम्मेलन, सयौं विद्वान गुरुहरुबाट समस्त सनातन वैदिक धर्मग्रन्थहरुको पाठपारायण, सवा लाख श्रीफल (नरिवल) बाट श्रीपञ्चमहालक्ष्मीको प्रसन्नताका लागि होम र सवा पाँच करोड दीप प्रज्ज्वलन गर्ने कार्यक्रम रहेको छ ।
