निष्पक्ष र विश्वसनीय खबरको सँगालो 
Khabar Punja
६ आश्विन २०८१, सोमबार
दमाैली । तनहुँको म्याग्दे गाउँपालिका–४ का वडाध्यक्ष दीपककुमार श्रेष्ठको फेसबुक ह्याक गरी रकम ठगी गरेको अभियोगमा एक जना पक्राउ परेका छन् ।
पक्राउ पर्नेमा सर्लाहीको बागमती नगरपालिका–१ बस्ने २६ वर्षीय सुमन बुढाथोकी रहेको जिल्ला प्रहरी कार्यालय तनहुँले जनाएको छ । बुढाथोकीलाई आज इलाका प्रहरी कार्यालय हरिवन सर्लाहीको आवश्यक सहयोगमा सर्लाहीको बागमती नगरपालिका–१ बाट पक्राउ गरिएको प्रहरी कार्यालय तनहुँले जनाएकाे छ ।
निज बुढाथोकीले श्रेष्ठको फेसबुक ह्याक गरी लमजुङको मध्यनेपाल नगरपालिका–३ सूर्यपाल बस्ने आकाश गुरुङलाई म्यासेन्जर मार्फत् रकमको आवश्यकता परेको भन्दै म्यासेज गरेका दिए । निजले विश्वासमा लिइ इसेवामार्फत् विसं २०८१ वैशाख १९ गतेदेखि पटक पटक गरी रु एक लाख पठाउन लगाई ठगी गरेको भनी आकाश गुरुङले प्रहरीमा उजुरी दिएका थिए ।
प्रहरीको अनुसन्धानपश्चात् रकम ठगी गर्ने व्यक्ति खोजतलास गर्ने क्रममा बुढाथोकी पक्राउ परेको प्रहरीले जनाएको छ । निजलाई तनहुँ अदालतबाट ठगी सम्बन्धी कसुरमा म्याद थप गरिएको छ ।
