Khabar Punja

दमाैली । तनहुँको व्यास नगरपालिकाले आगामी आर्थिक वर्ष २०८१÷८२ का लागि प्रस्तुत गरेको रु दुई अर्ब बढीको बजेट पारित गरेको छ । गत असार १० गते ४१ औं नगरसभामा प्रस्तुत रु दुई अर्ब छ करोड १८ लाख ८६ हजारको बजेट आज आयोजित नगरसभाले सर्वसम्मत रुपमा पारित गरेको हो ।

नगरप्रमुख वैकुण्ठ न्यौपानेको अध्यक्षतामा बसेको नगरसभाले आर्थिक विधेयक २०८१ र विनियोजन विधेयक २०८१ पारित गरेको छ ।

नगरसभाले विधायन समितिका संयोजक खेमराज पोखेलबाट प्रस्तावित व्यास नगरपालिका जलचर तथा जलीय जैविक विविधता संरक्षण विधेयक, २०८१, व्यास नगर प्लाष्टिकजन्य वस्तुको प्रतिबन्ध गर्ने सम्बन्धी विधेयक, २०८१, व्यास नगरपालिका सूर्तिजन्य पदार्थ (बिक्री वितरण र सेवन गर्न नियन्त्रण र निषेध गर्ने) विधेयक, २०८१ सर्वसम्मतले पारित गरेको नगरपालिकाका प्रवक्ता जीवन गुरुङले जानकारी दिए ।

त्यस्तै न्यायिक समितिका संयोजक उपप्रमुख इन्दिरा दरैबाट प्रस्तुत आ.व.२०८०।०८१ को न्यायिक समिति प्रतिवेदन, लेखा समितिका संयोजक काशीराम श्रेष्ठबाट प्रस्तावित लेखा समिति प्रतिवेदन, आर्थिक विकास समितिका संयोजक रमेशचन्द्र हड्खलेबाट प्रस्तुत आर्थिक विकास सम्बन्धी प्रतिवेदन, पूर्वाधार विकास समितिका संयोजक मनबहादुर गुरुङले प्रस्तुत गर्नु भएको पूर्वाधार सम्बन्धी प्रतिवेदन, सामाजिक विकास समितिका संयोजक काजीमान श्रेष्ठबाट प्रस्तुत सामाजिक विकास सम्बन्धी प्रतिवेदन, सार्वजनिक सेवा तथा सुशासन समितिका संयोजक सुरेश थापाबाट प्रस्तुत सार्वजनिक सेवा तथा सुशासन सम्बन्धी प्रतिवेदन, विधायन समितिका संयोजक खेमराज पोखेलबाट प्रस्तुत विधायन समिति सम्बन्धी प्रतिवेदन र वन तथा वातावरण समितिका संयोजक रनसिं नेपालीबाट प्रस्तुत वन तथा वातावरण सम्बन्धी प्रतिवेदन संशोधन सहित सर्वसम्मत पारित भएको छ ।

त्यस्तै प्रमुख प्रशासकीय अधिकृत काशीराम गैरेद्वारा प्रस्तुत कर्मचारी सङ्गठन संरचना सम्बन्धी संशोधन प्रस्ताव र घर नक्सा सम्बन्धी अभिलेखीकरण सम्बन्धी प्रस्ताव पारित गर्ने निर्णय भएको नगरपालिकाले जनाएको छ ।

नगरसभामा आर्थिक वर्ष २०८०÷०८१ अन्तर्गत असार २४ गतेसम्मको कुल आय रु एक अर्ब २६ करोड १३ लाख दुई हजार नौ सय ७४ मध्ये रु एक अर्ब १९ करोड ८५ लाख तीन हजार ७६ खर्च भएको विवरण प्रस्तुत गरिएको छ ।