निष्पक्ष र विश्वसनीय खबरको सँगालो 
Khabar Punja
२४ माघ २०८१, शुक्रबार
दमाैली । तनहुँको बन्दीपुर गाउँपालिका–५ फलाम डाँडामा चितुवाको आक्रमणबाट आज साँझ एक बालकको मृत्यु भएको छ । मृत्यु हुनेमा १३ वर्षीय सुन्दर अछामी रहेको बन्दीपुर गाउँपालिकाका अध्यक्ष सुरेन्द्र थापाले जानकारी दिए ।
घर नजिकै चितुवाको आक्रमणमा परेका अछामीलाई बन्दीपुर अस्पताल लैजाँदै गर्दा मृत्यु भएको हो । अध्यक्ष थापाले भने, “साँझको बेला घर नजिकैबाट चितुवाले आक्रमण गरेर लगेछ, थाहा पाउने बित्तिकै जाँदा बालक गम्भीर घाइते अवस्थामा भेटिएका थिए ।” मृतक बालकको शव अस्पतालमा राखिएको छ ।
बन्दीपुरमा डेढ वर्ष यता चितुवाले दुःख दिएको थिएन । “बन्दीपुरमा पनि केही वर्ष यता चितुवाले आक्रमण गरिरहेको छ, पछिल्लो डेढ वर्ष यता त्यस्तो समस्या भएको थिएन । आज एक्कासी चितुवाले आक्रमण ग¥यो ।”
वडाध्यक्ष धु्रवप्रसाद लामिछानेले साँझका बेला घरबाहिर ननिस्कन तथा बालबालिकालाई एक्लै नछाड्न आग्रह गरेका छन् ।
चितुवाको आक्रमणबाट पछिल्लो सात वर्षको अवधिमा १३ बालबालिकाले ज्यान गुमाएका छन् । चितुवाको आक्रमणबाट भानु नगरपालिका, शुक्लागण्डकी नगरपालिका, आँबुखैरेनी गाउँपालिका, बन्दीपुर गाउँपालिकामा बालबालिकाको मृत्यु भएको छ ।
