निष्पक्ष र विश्वसनीय खबरको सँगालो 
Khabar Punja
२२ भाद्र २०८१, आईतवार
दमौली । तनहुँको शुक्लागण्डकी नगरपालिका-८ एक्लेडॉडामा निर्माण हुने बुद्ध प्रतिमाका लागि गुरुङ मगर सांस्कृतिक एकता समाजका अध्यक्ष एवं नेकपा माओवादी केन्द्र शुक्लागण्डकी अध्यक्ष मनराज गुरुङले एक लाख बढी आर्थिक सहयोग गरेका छन् ।
उनले जन्मदिनको अवसर पारेर आइतबार रु एक लाख तीन हजार तीन सय३३ को चेक गुरुङ मगर सांस्कृतिक एकता समाजका सचिव अमरराज थापालाई हस्तान्तरण गरेका हुन् । जन्मदिनमा फजुल खर्च नगरी सामाजिक काममा सहयोग गर्न पाउँदा उनले खुसी व्यक्त गरेका छन् ।
एक्लेडाँडामा २९ फिट अग्लो बुद्ध मूर्ति निर्माणका लागि शिलान्यास भइसकेको छ ।
यस ठाउँलाई धार्मिक पर्यटकीय गन्तव्यस्थल बनाउने उद्धेश्यसहित समाजकै नेतृत्वमा २९ फिट अग्लो बुद्धको मूर्ति बनाउन लागिएको हो ।
बुद्ध मूर्ति निर्माणका लागि रु एक करोड बजेट लाग्नेछ । समाजले चन्दा सङ्कलन गरी मूर्ति निर्माण गर्ने लक्ष्य राखेको छ ।
एक्ले सामुदायिक वनभित्र रहेको यस ठाउँमा पूर्वाधार निर्माणका लागि विस्तृत अध्ययन प्रतिवेदन (डिपिआर) तयार भइसकेको छ । यस ठाउँलाई उजागर र प्रचारप्रसार गरी पर्यटकीय गन्तव्य बनाउन एक्लेडाँडा पर्यटन प्रवद्धन समिति गठन गरिएको छ ।
