निष्पक्ष र विश्वसनीय खबरको सँगालो 
Khabar Punja
३ असार २०८२, बुधबार
दमौली, १६ वैशाख । म्याग्दे गाउँपालिका-४ र ५ छाङ युवा सञ्जालको आयोजनामा वैशाख २६ गतेदेखि प्रथम छङ्गेली कप वडा स्तरीय भलिबल प्रतियोगिता आयोजना हुने भएको छ ।
मंगलबार दमौलीमा पत्रकार सम्मेलनको आयोजना गरी सञ्जालले प्रतियोगिताबारे जानकारी गराएको हो ।
‘कला संस्कृति र खेलकुदको प्रबर्धन, हाम्रो गाउँ हाम्रो ठाउँ छाङ हाम्रो पहिचान’ भन्ने नाराका साथ वडा स्तरीय पुरुष भलिबल प्रतियोगिता हुन लागेको हो।
रित्तिदै गएको छाङ गाउँको पुनजागरण गर्न र छाङको आन्तरिक पर्यटन प्रबर्धनका लागि प्रतियोगिता आयोजना गरिएको छाङ युवा सञ्जालका अध्यक्ष भक्तबहादुर गुरुङ (निशान) ले जानकारी दिए ।
प्रतियोगितामा १५ टिमको सहभागिता रहने अनुमान गरिएको छ । म्याग्देभित्रका वडालाई टिम दर्ताका लागि रु दुई हजार पॉच सय र बाहिरका लागि रु पॉच हजार शुल्क तोकिएको उनको भनाइ छ ।
प्रतियोगिता सञ्चालनका लागि गाउँपालिकाले रु एक लाख सहयोग गरेको छ भने अन्य दाताबाट सहयोगको प्रतिबद्धता व्यक्त भएको छ ।
प्रतियोगिता संयोजक गौरवराज रानाले अवसरको खोजीमा छाङका स्थानीय शहर झर्दै गएको र खेलकुदको माध्यमबाट गाउँ उक्लिने वातावरण सिर्जना गर्न खोजिएको बताए । उनले भने, ‘शिक्षा, व्यवसाय, रोजगारको खोजीमा स्थानीय शहर झरे, खेलकुदको माध्यमबाट गाउँ उक्लिने वातावरण बनाउन खोजेका हौ ।’
प्रतियोगितामा विजेतालाई रु एक लाख एक हजार र उपविजेतालाई रु ५० हजार पॉच सय नगद पुरस्कार प्रदान गरिनेछ । त्यस्तै सेमिफाइनलका दुई टिमलाई रु १५ हजार प्रदान गरिने आयोजकले जनाएको छ ।
