निष्पक्ष र विश्वसनीय खबरको सँगालो 
Khabar Punja
९ जेष्ठ २०८२, शुक्रबार
दमौली, २८ वैशाख। तनहुँको शुक्ला साहित्य सङ्गमले शनिबार आयोजना गरेको गण्डकी प्रदेशस्तरीय गजल प्रतियोगिताको उपाधि कास्कीका निकेश गिरीले जितेका छन् । प्रतियोगितामा २९ प्रतिस्पर्धीलाई पछाडि पार्दै कास्कीका गिरीले प्रदेशस्तरीय प्रतियोगिताको उपाधि जितेका हुन् ।
प्रतियोगितामा गोरखाका कृष्णबहादुर महत द्वितीय, कास्कीका मदन घिमिरे तृतीय भएका छन् । विजयीहरुलाई क्रमशः रु ११ हजार, रु सात हजार र रु पाँच हजार नगद पुरस्कार प्रदान गरिएको शुक्ला साहित्य सङ्गमका अध्यक्ष टुकादेवी आचार्यले जानकारी दिइन् ।
प्रतियोगितामा ३० जना गजलकारको अनलाइन मार्फत् सहभागिता रहेको थियो । उत्कृष्ट छनोट भएका दश जनालाई भौतिक उपस्थितिमा प्रतिस्पर्धा गराइएको थियो ।
प्रतियोगितामा गजलकार रुपिन्द्र प्रभावी, सरस्वती श्रेष्ठ र अनुराग अधिकारीले निर्णायकको भूमिका निर्वाह गरेका थिए ।
विजयीहरुलाई शुक्लागण्डकी नगरपालिकाका उपप्रमुख खुमबहादुर विकले पुरस्कार वितरण गरे ।
