निष्पक्ष र विश्वसनीय खबरको सँगालो 
Khabar Punja
२६ बैशाख २०८३, आईतवार
दमौली, २३ जेठ । तनहुँको व्यास नगरपालिका–१० बैरेनीस्थित चण्डिदेवी राष्ट्रिय माध्यमिक विद्यालयमा दृष्टिविहिन अपाङ्गता भएका विद्यालय उमेर समूहका बालबालिकालाई लक्षित गरी आवासीय स्रोत कक्षा सञ्चालन गरिएको छ । स्रोतकक्षामा सात विद्यार्थी अध्ययनरत छन् ।
दृष्टिविहिन विद्यार्थीलाई सहज रुपमा अध्ययन गर्न पाउने वातावरण सिर्जना गर्न विद्यालयमा आवासीय कक्षा सञ्चालन गरिएको हो । विद्यालयका प्रधानाध्यापक रामचन्द्र पोख्रेलले स्रोत कक्षामा तनहुँ जिल्लाका विभिन्न वडाका दृष्टि सम्बन्धि अपाङ्गता भएका बालबालिकालाई ब्रेललिपी मार्फत् शिक्षण सञ्चालन गरिएको जानकारी दिए ।
फरक क्षमता भएका बालबालिकालाई ब्रेललिपी मार्फत् पठनपाठनको व्यवस्था मिलाइएको र स्रोतकक्षामा बालबालिकाको हेरचाहका लागि ताराकुमारी पोख्रेललाई जिम्मेवारी दिइएको छ । उनले भने, “स्रोतकक्षामा दृष्टिविहिन अपाङ्गता भएका बालबालिकालाई आफ्नै छोराछोरी सरह लालनपालनको व्यवस्था मिलाइएको छ ।”
लेखाजोखा संयोजक इश्वर बास्तोलाले दृष्टि सम्बन्धि अपाङ्गता भएका बालबालिकालाई स्रोत कक्षामा भर्ना गर्न सम्बन्धित अभिभावकलाई परामर्श प्रदान गरिएको जानकारी दिए ।
विद्यालयले बालबालिकाको पठनपाठनसँगै बस्नका लागि आवासीय कक्षा कोठा, भान्सा र शौचालयको व्यवस्था मिलाएको छ । विद्यार्थीलाई पोशाक, शैक्षिक सामग्री, बस्नका लागि बेड, बेडसिट, सिरक, गद्धा साबुनलगायत आवश्यक सामग्रीको व्यवस्था विद्यालयले मिलाएको छ ।
स्रोत कक्षा सञ्चालनका लागि व्यास नगरपालिकाले विद्यालयलाई प्रति विद्यार्थी रु ५० हजारका दरले दश महिनाको अनुदान रकम उपलव्ध गराएको छ । विद्यालयका शिक्षक यमप्रसाद सापकोटाले भने, “हाललाई विद्यालयकै भवनमा स्रोत कक्षा सञ्चालन गरेका छौं । त्यसका लागि गण्डकी प्रदेश सरकार मार्फत् रु तीन लाख बराबरको सहयोग विद्यालयलाई प्राप्त भएको छ ।”
