निष्पक्ष र विश्वसनीय खबरको सँगालो 
Khabar Punja
७ माघ २०८२, बुधबार
दमाैली, २४ कात्तिक । व्यास नगरपालिका–१३ जनजागृती गङ्गा माध्यमिक विद्यालयका विपन्न विद्यार्थीलाई साेमबार न्यानो कपडा वितरण गरिएको छ । सामाजिक अभियान्ता सुदीप गफ्फारको सक्रियता र पूर्व विद्यार्थी मञ्चको समन्वयमा यहाँका २५ विपन्न विद्यार्थीलाई स्वीटर वितरण गरिएको हो ।
चिसो मौसममा कठ्याङ्ग्रिदै विद्यालय आउन नपरोस् भनेर विद्यार्थीलाई स्वीटर वितरण गरिएको सामाजिक अभियान्ता गफ्फारले जानकारी दिए। देउसीभैलो खेलेर सङ्कलित रकमबाट स्वीटर खरिद गरी विद्यार्थीलाई वितरण गरिएको उनकाे भनाइ थियो ।
उनले भने, “देउसीभैलो खेलेको रकम र देश तथा विदेशबाट प्राप्त सहयोगबाट अभियान न्यानो सञ्चालन गरिरहेका छौ । विपन्न विद्यालयमा विद्यार्थीलाई न्यानो कपडा वितरण गरिनेछ ।”
व्यास नगरपालिका–११ का कार्यवाहक वडाध्यक्ष हरिशचन्द्र पन्थले सामाजिक अभियान्ता गफ्फारको सामाजिक कामले समाजलाई सकारात्मक सन्देश दिएको चर्चा गरे। विद्यालयको शैक्षिक गुणस्तर वृद्धिका लागि वडाले पनि निरन्तर पहल गरिरहेको उनकाे भनाइ थियो ।
जनजागृती गङ्गा माध्यमिक विद्यालय पूर्व विद्यार्थी मञ्चका अध्यक्ष सनम तामाङले विगतका दुई वर्षमा मञ्चकै सक्रियतामा विद्यालयका विद्यार्थीलाई स्वीटर वितरण गरिएपनि यस वर्ष स्रोत जुटाउन नसकिएको उल्लेख गरे। सदरमुकामबाट नजिकै रहेको विद्यालय भएपनि विपन्न विद्यार्थी अध्ययनरत गर्ने भएकाले सामाजिक अभियान्ता गफ्फारलाई सहयोग गर्न आग्रह गरेअनुरुप न्यानो कपडा वितरण गर्न सकिएको उनले चर्चा गरे।
आदिकवि भानुभक्त क्याम्पसका स्ववियु सभापति अनुप आलेले सामाजिक अभियान्ता सुदीप गफ्फारकाे कामलाई सबैले सम्मान गर्नुपर्ने बताए ।
विद्यालयका सहायक प्रधानाध्यापक सिद्धराज शर्माले सहयोगी दाताको सहयोगका कारण विद्यार्थीलाई चिसो मौसममा कठ्याङ्ग्रिदै विद्यालय आउने अवस्थाको अन्त्य हुने उल्लेख गरे ।
सदरमुकाम दमौलीबाट करिब सात किलोमिटर दूरीमा अवस्थितमा विद्यालयमा एक सय २० भन्दा बढि विद्यार्थी अध्ययनरत छन् ।
