निष्पक्ष र विश्वसनीय खबरको सँगालो 
Khabar Punja
२५ पुष २०८२, शनिबार
दमौली, २९ कात्तिक । व्यास नगरपालिकाले आयोजना गरेको दोस्रो मेयर कप वडा स्तरीय भलिबल प्रतियोगिताको उपाधि व्यास नगरपालिका–१३ ले जितेको छ । व्यास नगरपालिका–३ खुल्ला मैदानमा शनिबार सम्पन्न फाइनल खेलमा साविक विजेता व्यास नगरपालिका–६ लाई पराजित गर्दै वडा नम्बर १३ ले उपाधि जितेको हो ।
व्यास नगरपालिका–१३ ले व्यास नगरपालिका–६ लाई ३–१ सेटमा पराजित गरेको छ ।
पहिलो मेयर कप वडा स्तरीय भलिबल प्रतियोगिताको साविक विजेता व्यास नगरपालिका–६ ले यसपटक दोस्रो स्थानमा चित्त बुझाउन बाध्य भयो ।
यसअघि आजै तेस्रो स्थानका लागि भएको खेलमा व्यास नगरपालिका–५ विजयी भएको छ । व्यास नगरपालिका–५ ले व्यास नगरपालिका–८ लाई पराजित गरेको छ।
प्रतियोगितामा प्रथम भएको टिमले नगद रु ५० हजार, द्वितीय भएको टिमले नगद रु ३५ हजार र तृतीय भएको टिमले नगद रु २० हजार र ट्रफी प्राप्त गरेको छ ।
प्रतियोगितामा व्यास नगरपालिका–१३ का दिपेश आले उत्कृष्ट खेलाडी, व्यास नगरपालिका–६ का टाइसन गुरुङ उत्कृष्ट लिफ्टर र व्यास नगरपालिका–१३ का मोतीराम थापा स्पाइकर घोषित भएका छन् ।
प्रतियोगितामा व्यास नगरपालिका–७ बाहेक नगरपालिकाका १३ वटा वडाको सहभागिता रहेको नगर खेलकुद विकास समितिका अध्यक्ष एवं व्यास नगरपालिका–६ का वडाध्यक्ष जीवन गुरुङले जानकारी दिए ।
विजेतालाई पुरस्कार गर्दै व्यास नगरपालिकाका प्रमुख वैकुण्ठ न्यौपानेले नगरपालिकाले खेल क्षेत्रलाई प्राथमिकतामा राखेको बताए ।
वडास्तरबाटै दक्ष भलिबल खेलाडी उत्पादन गर्ने उद्धेश्यसहित मेयर कप वडा स्तरीय भलिबल प्रतियोगिता आयोजना गरिएको नगर खेलकुद विकास समितिका अध्यक्ष गुरुङले जानकारी दिए । नगरपालिकाले निकट भविष्यमै तनहुँका पालिकास्तरीय भलिबल प्रतियोगिता गर्ने उद्धेश्य राखेको उनले बताए ।
