निष्पक्ष र विश्वसनीय खबरको सँगालो 
Khabar Punja
४ माघ २०८२, आईतवार
दमौली, ४ माघ । स्वतन्त्र समूह जोशीले तनहुँ क्षेत्र नम्बर १ र क्षेत्र नम्बर २ दुवै निर्वाचन क्षेत्रमा उम्मेदवारी दिने निर्णय गरेको छ।
आइतबार सम्पन्न समूहको विशेष जिल्ला स्तरीय भेलाले उक्त निर्णय गरेको हो। जिल्लाका विभिन्न तह र तप्काका प्रतिनिधि, शुभचिन्तक तथा स्थानीय अगुवाहरूको सहभागितामा सम्पन्न भेलामा तनहुँको वर्तमान राजनीतिक अवस्था र आगामी निर्वाचनका सन्दर्भमा विस्तृत छलफल गरिएको थियो।
लामो समयदेखि तनहुँको समृद्धि र विकासका लागि क्रियाशील रहेको स्वतन्त्र समूह जोशीले परम्परागत राजनीतिक दलहरूबाट जनअपेक्षा पूरा हुन नसकेको निष्कर्ष निकाल्दै आम नागरिकको भावना, चाहना र जिल्लाको समग्र हितलाई मध्यनजर गरी निर्वाचनमा होमिने निर्णय गरेको सो समूहका नेता दीपकराज जोशीले जानकारी दिए।
भेलाले निर्वाचन केन्द्रित विभिन्न उप–समितिहरू गठन गर्ने, टोल तथा वडा तहसम्म संगठन विस्तार गर्ने र जनताका वास्तविक मुद्दाहरू समेटेर चुनावी घोषणापत्र तयार गर्ने निर्णय समेत गरेको छ। सभाले तनहुँको सर्वाङ्गिण विकास नै समूहको मुख्य संकल्प रहने स्पष्ट पारेको छ।
