Khabar Punja

दमौली, २ फागुन । साँझ ढल्दै जाँदा टुँडिखेलतर्फ उक्लने मानिसहरूको भीड बाक्लिँदै गयो। कोही साथीहरूसँग, कोही परिवारसँग त कोही प्रणय दिवस मनाउन आएका जोडीहरू—सबैको गन्तव्य एउटै थियो, नेपथ्यको सांगीतिक यात्रा सँगै अनुभूति गर्ने। कार्यक्रम सुरु भएसँगै टुँडिखेल दर्शकले भरिभराउ बन्यो, जहाँ उत्साह, उमंग र प्रतीक्षाको मिश्रण स्पष्ट देखिन्थ्यो।

तनहुँको बन्दीपुर गाउँपालिका–४ स्थित टुँडिखेलमा प्रणय दिवसको अवसरमा आयोजित नेपथ्यको कन्सर्टमा संगीतप्रेमीहरूको उल्लेखनीय उपस्थिति देखिएको छ। कन्सर्टका कारण टुँडिखेल क्षेत्र दर्शकले भरिभराउ बनेको थियो भने बन्दीपुरको माहोल नै सांगीतिक उत्सवमय बनेको थियो।

चर्चित गायक अमृत गुरुङले आफ्ना लोकप्रिय गीतहरू प्रस्तुत गर्दा दर्शकले ताली, हुटिङ र सामूहिक गायनमार्फत भरपुर साथ दिएका थिए। “रेशम”, “तालको पानी”, “छेक्यो छेक्यो” लगायतका गीतहरूमा दर्शकहरू झुमेका थिए भने युवा–युवतीदेखि सबै उमेर समूहका दर्शकहरूको उत्साहपूर्ण सहभागिता देखिएको थियो।

प्रणय दिवसको अवसर पारेर आयोजना गरिएको उक्त कन्सर्टले बन्दीपुरको पर्यटन प्रवर्द्धनमा समेत महत्वपूर्ण योगदान पुर्‍याएको स्थानीय व्यवसायीहरूले बताएका छन्। कन्सर्ट हेर्न विभिन्न स्थानबाट आएका आन्तरिक पर्यटकका कारण बन्दीपुरका होटल तथा लजहरू भरिभराउ भएका छन् । यसले स्थानीय व्यवसायीहरूलाई आर्थिक रूपमा पनि सकारात्मक प्रभाव पारेको छ।

स्थानीय तह र आयोजक संस्थाले यस्ता सांगीतिक तथा सांस्कृतिक कार्यक्रमले बन्दीपुरलाई आन्तरिक तथा बाह्य पर्यटकको आकर्षणको केन्द्रका रूपमा थप स्थापित गर्ने विश्वास व्यक्त गरेका छन्। प्रणय दिवसको अवसरमा आयोजित यो कन्सर्टले बन्दीपुरमा सांगीतिक उत्साहसँगै पर्यटन प्रवर्द्धनको नयाँ ऊर्जा थपेको छ।

स्थानीय संयोजक रवि श्रेष्ठले कार्यक्रम भव्य रुपमा सम्पन्न भएको बताएका छन् ।