निष्पक्ष र विश्वसनीय खबरको सँगालो 
Khabar Punja
११ चैत्र २०८२, बिहीबार
दमाैली, १२ चैत । चैतेदसैंको अवसरमा तनहुँको पवित्र धार्मिकस्थल तनहुँ कालिका मन्दिरमा दर्शनार्थीको भीड लागेको छ । व्यास नगरपालिका–४ सहिद शान्ति पार्कभित्र रहेको तनहुँ कालिका मन्दिरमा आज बिहानैदेखि दर्शनार्थीको भीड लागेको हो ।
बडादसै र चैतेदसैंको अवसरमा तनहुँ कालिका मन्दिरमा विशेष पूजाआजा हुने गरेको छ । मन्दिरमा पूजाआजाका लागि दमौली आसपासबाट भक्तजन आएको व्यास–४ का वडाध्यक्ष मनबहादुर गुरुङले जानकारी दिए ।
तनहुँ कालिका मन्दिर मल्लकालिन प्यागोडा शैलीमा निर्माण गरिएको छ । रु तीन करोड लागतमा मन्दिर निर्माण गरिएको हो । तीन तले र ५५ फिट उचाईको मन्दिरमा विभिन्न नामका देवीदेवताका आकृति भएको ६० वटा टुडाल हालिएको छ भने मन्दिरमा ९ फिट उचाईको गजुर राखिएको छ ।
पृथ्वीराजमार्ग अन्तर्गत दमौली बजारबाट एक किमिको दूरीमा रहेको उक्त पार्कसम्म पुग्नका लागि पैदलमार्ग निर्माण गरिएको छ भने सवारी साधनका लागि बाटो पक्की बनाइनेछ । अप्ठ्यारो रहेको ठाउँमा ८० मिटर बाटो ढलान गरिएको छ ।
दमौली बजारबाट एक किलोमिटर दूरीमा पर्ने पार्कभित्र सरकार, निजी क्षेत्र र स्थानीयवासीको सहयोगमा केही पूर्वाधार निर्माण सम्पन्न भइसकेको छ भने गुरुयोजना अनुसारको थप पूर्वाधार निर्माण हुन बाँकी रहेको छ ।
