निष्पक्ष र विश्वसनीय खबरको सँगालो 
Khabar Punja
८ बैशाख २०८३, बुधबार
दमौली, ३० चैत । व्यास नगरपालिकाको ३४ औं स्थापना दिवसका अवसरमा नगर खेलकुद विकास समितिले आयोजना गरेको अन्तरजिल्ला पालिकास्तरीय महिला पुरुष भलिबलको महिलातर्फ देवघाट गाउँपालिका र घिरिङ गाउँपालिका फाइनलमा प्रवेश गरेका छन् ।
आजदेखि सुरु भएको भलिबल प्रतियोगिताको सेमिफाइनलमा शुक्लागण्डकी नगरपालिकालाई पराजित गर्दै देवघाट गाउँपालिका फाइनल प्रवेश गरेको हो । देवघाटले शुक्लागण्डकीलाई २–० सेटले पराजित गरेको छ ।
यस्तै घिरिङ गाउँपालिकाले भिमाद नगरपालिकालाई पराजित गर्दै फाइनलमा प्रवेश गरेको छ । घिरिङले भिमादलाई २–१ सेटमा पराजित गरेको छ ।
यस्तै आजै भएको पहिलो चरणको खेलमा शुक्लागण्डकी नगरपालिका र म्याग्दे गाउँपालिकाबीच भएको खेलमा शुक्लागण्डकी विजयी भएको थियो । व्यास नगरपालिका र देवघाट गाउँपालिकाबीच भएको खेलमा देवघाट गाउँपालिका विजयी भएको थियो । ऋषिङ गाउँपालिका र घिरिङ गाउँपालिकाबीच भएको खेलमा घिरिङ विजयी भएको थियो ।
फाइनल खेल वैशाख २ गते हुने नगर खेलकुद विकास समितिका संयोजक कुमार गुरुङले जानकारी दिए ।
यस्तै पुरुषतर्फको खेल भोलि हुनेछ । प्रतियोगितामा महिलातर्फ सात र पुरुषतर्फ छ पालिकाको सहभागिता रहेको छ ।
पुरुषतर्फ विजेतालाई नगद रु एक लाख र उपविजेतालाई रु ७५ हजार प्रदान गरिनेछ । महिलातर्फ विजेतालाई नगद रु ७५ हजार र उपविजेतालाई रु ५० हजार प्रदान गरिनेछ ।
