निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
म्याग्दे : सूर्य नेपाल प्रालिले कोभिड-१९ नियन्त्रणका लागि तनहुँको म्याग्दे गाउँपालिकाको कोरोना नियन्त्रण तथा व्यवस्थापन कोषमा २० लाख सहयोग गरेको छ । शुक्लागण्डकी नगरपालिका-७ शेरामा रहेको सूर्य नेपालले कोभिड नियन्त्रणका लागि गाउँपालिकालाई २० लाख सहयोग गरेको हो ।
सूर्य नेपालका कारखाना व्यवस्थापक बाबुराम कार्की, मानव संशाधन विभाग प्रमुख अन्जन दुवाडी र सुरक्षा प्रमुख होमनाथ अर्यालले उक्त रकमको चेक आइतबार गाउँपालिकाका अध्यक्ष मायादेवी राना र उपाध्यक्ष बालकृष्ण घिमिरेलाई हस्तान्तण गरेका छन् ।
सामाजिक उत्तरदायित्व वहन गर्दै कम्पनीले कोरोना रोकथामका लागि सहयोग गरेको कार्कीले बताए । कम्पनीले सामाजिक उत्तरदायित्व वहन अन्तरगत गाउँपालिकालाई यस अगाडी एक थान एम्बुलेन्स पनि सहयोग गरेको थियो । त्यस्तै शुक्लागण्डकी नगरपालिकालाई पनि एक थान एम्बुलेन्स सहयोग गरेको कार्कीले जानकारी दिए ।
म्याग्दे गाउँपालिकाका अध्यक्ष रानाले कोरोना रोकथाम र परीक्षणका लागि प्राप्त सहयोगले ठूलो सहयोग गर्ने बताइन् । गाउँपालिकाका उपाध्यक्ष घिमिरेले स्रोत साधनमा कमी भइरहेको अवस्थामा सूर्य नेपालले गरेको सहयोग उदाहरणीय रहेको बताए । प्रमुख प्रशासकीय अधिकृत नारायणप्रसाद अधिकारीले कोरोना रोकथामका लागि गाउँपालिका क्रियाशील रहेको बताउँदै सहयोगप्रति सूर्य नेपाललाई धन्यवाद दिए ।
कार्यक्रममा गाउँपालिकाका उद्योग शाखा प्रमुख प्रदीप न्यौपाने, योजना शाखा प्रमुख श्रीराम खनाल लगायत सहभागि थिए ।
