निष्पक्ष र विश्वसनीय खबरको सँगालो 
Khabar Punja
१ मंसिर २०८१, आईतवार
दमाैली । आगामी वैशाख ३० गते हुने स्थानीय तह निर्वाचनका लागि सोमबार नेपाली कांग्रेस, नेकपा एमाले, नेकपा माओवादी केन्द्र लगायतका दलहरुले उम्मेदवारी दर्ता गराएका छन् । उम्मेदवार टुङ्ग्याउन सकस भएपछि ठूला दलहरुले सोमबार मात्रै उम्मेदवारी दर्ता गराएका हुन् ।
तनहुँका केही पालिकामा कांग्रेस, एमाले र माओवादीबाट निर्वाचित जनप्रतिनिधिले पुनः टिकट पाएका छन् । व्यास नगरपालिकाको मेयरमा कांग्रेसबाट वैकुण्ठ न्यौपानेले टिकट पाउँदा उपमेयर मीरा जोशीले टिकट पाइनन् ।
देवघाट गाउँपालिकाको अध्यक्षमा एमालेबाट दुर्गबहादुर थापा, आँबुखैरेनीको अध्यक्षमा कांग्रेसबाट गिरबहादुर थापा, बन्दीपुर गाउँपालिकाको अध्यक्षमा पूर्णसिं थापा र उपाध्यक्षमा करुणा गुरुङ, म्याग्देको अध्यक्षमा कांग्रेसबाट माया राना र उपाध्यक्षमा बालकृष्ण घिमिरे दोहोरिएका छन् । भिमाद नगरपालिकाको उपप्रमुखमा एमालेबाट शारदा खनाल, ऋषिङ गाउँपालिकाको अध्यक्षमा कांग्रेसबाट राजेन्द्रकृष्ण श्रेष्ठ र गिनुमाया थापा दोहोरिएका छन् ।
