निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
एजेन्सी । दुईपटकको अग्रता जोगाउन नसक्दा स्पेनिस महारथी बार्सिलोनाले बुधबार बिहान सिजनपूर्वको मैत्रीपूर्ण खेलमा इटालियन क्लब युभेन्टससँग २–२ को बराबरी खेलेको छ ।
अमेरिका भ्रमणमा रहेको बार्सिलोनाले टेक्ससको कटन बल रंगशालामा ३४औँ मिनेटमा अग्रता लिएको थियो । फ्रान्सका विंगर औसमाने डेम्बेलेले गरेको गोलबाट बार्सिलोनाले अग्रता लिएको थियो । ३९औँ मिनेटमा युभेन्टसका मोइस किनले बराबरी गोल फर्काए ।
त्यसको एक मिनेट बित्न नपाउँदै डेम्बेले अर्को गोल थपेपछि बार्सिलोनाले पुनः अग्रता लियो । ५२औँ मिनेटमा किनले पुनः बराबरी गोल फर्काए ।
बार्सिलोनाले अमेरिका भ्रमणमा यसअघि ला लिगाकै चिरप्रतिद्वन्द्वी रियाल मड्रिडलाई १–० ले हराएको थियो ।
यस्तै, अमेरिकाकै क्लब इन्टर मियामी सीएफलाई ६–० ले हराएको थियो । बार्सिलोनाले अब आउँदो आइतबार न्युयोर्क रेडबुल्ससँग प्रतिस्पर्धा गर्नेछ ।
युभेन्टसले यसअघि मैत्रीपूर्ण खेलमा चिभासलाई २–० ले हराएको थियो । युभेन्टसले अब आइतबार रियाल मड्रिडसँग प्रतिस्पर्धा गर्नेछ ।
