निष्पक्ष र विश्वसनीय खबरको सँगालो 
Khabar Punja
१४ मंसिर २०८१, शनिबार
दमौली । तनहुँको ऑबुखैरेनी गाउँपालिका र गोरखाको पालुङटार नगरपालिकाले आन्तरिक राजश्व वृद्धि र रोजगारी सिर्जनाका लागि सहकार्य गर्ने भएका छन् ।
ऑबुखैरेनीमा मंगलबार सम्पन्न अन्तरपालिका बैठकले दुवै पालिकाको राजश्व वृद्धि र रोजगारी सिर्जना गर्नका लागि सहकार्य गर्ने निर्णय गरेको हो ।
दुई पालिकाको सीमाक्षेत्रमा पर्ने मर्स्याङ्दी जलविद्युत आयोजनाबाट निर्मित कृत्रिम तालमा मत्स्यपालन तथा जलपर्यटन पूर्वाधार निर्माण गर्ने निर्णय गरेको ऑबुखैरेनीका अध्यक्ष शुक्र चुमानले जानकारी दिए । ‘यसबाट आन्तरिक राजस्व वृद्धि तथा स्थानीय श्रोतको परिचालन गरी रोजगारी सिर्जना हुनेछ,’ उनले भने ।
उनका अनुसार पालिकाको विकास निर्माण र सार्वजनिक सेवाका विषयमा निरन्तर संवाद, छलफल, समन्वय र सहकार्य गर्ने निर्णय भएको छ ।
बैठकमा पालुङटार नगरपालिकाका प्रमुख विवस चिन्तन, उपप्रमुख बन्दना पाण्डे, ऑबुखैरेनीका प्रमुख प्रशासकीय अधिकृत विष्णुप्रसाद शर्मा, पालुङटारका प्रमुख प्रशासकीय अधिकृत गौतम भण्डारी लगायत सहभागी थिए ।
