निष्पक्ष र विश्वसनीय खबरको सँगालो 
Khabar Punja
१३ मंसिर २०८१, शुक्रबार
दमौली । राष्ट्रिय स्वतन्त्र पार्टीका उपसभापति डा. स्वर्णिम वाग्लेको नेतृत्वमा दुलेगौडा-हर्कपुर सडकमा दबाब यात्रा हुने भएको छ ।
मोटरमार्ग निर्माणमा ढिलाई भएकाले सम्बन्धित निकायको ध्यानाकर्षण गराउन वाग्लेको नेतृत्वमा दबाब यात्रा हुन लागेको हो ।
शुक्लागण्डकी-३ वनकेवाचोकदेखु दबाब यात्रा हुने रास्वपाका नेता शंकर पन्तले जानकारी दिए ।
२०७६ साल मंसिर २४ गते शिलान्यास भएको उक्त सडक निर्माण व्यवसायीको लापरबाहीका कारण ढिलाई भएको छ । २०७८ माघ १० गते भित्र सम्पन्न हुनुपर्ने भएपनि हालसम्म प्रगति छैन ।
दुलेगौडा–हर्कपुर सडकको १०.१८ किलोमिटर सडक कालोपत्रका लागि विसं २०७६ कात्तिक ४ गते सम्झौता भएको थियो । उक्त खण्डको प्रगति हालसम्म ३१.५४ प्रतिशत छ । उक्त खण्डको म्याद अन्तिम पटकका लागि विसं २०८० जेठ १४ गतेसम्म थप भएको थियो । यस अगाडि उक्त खण्डको दुईपटक म्याद थप भइसकेको छ ।
उक्त खण्ड कालोपत्रका लागि रु २५ करोड १० लाख ६० हजारमा सम्झौता भएको थियो । शुक्लागण्डकी नगरपालिका, म्याग्दे गाउँपालिका हुँदै व्यास नगरपालिकासँग जोडिने उक्त खण्डको दूरी २३ किलोमिटर छ । पहिलो चरणमा १० किलोमिटर सडक कालोपत्रका लागि ठेक्का सम्झौता भएको थियो । ट्रयाक खुलेको २४ वर्षपछि कालोपत्र सुरु हुँदा स्थानीयवासी खुसी भएका थिए । तर कामको प्रगति नबढ्दा स्थानीवासी चिन्तित छन् ।
