निष्पक्ष र विश्वसनीय खबरको सँगालो 
Khabar Punja
१४ मंसिर २०८१, शनिबार
तनहुँ : तनहुँको घिरिङ गाउँपालिका–२ सुन्धाराका कृषकले एकैदिन साढे सात लाख बराबरको खसीबोका विक्री गरेका छन् । दशंैका लागि यहाँका कृषकले केही दिन अगाडी एकैदिनमा ५३ वटा खसीबोका विक्री गरेका हुन् ।
खसीबोका बजारीकरणको व्यवस्था घिरिङ सुन्धारा सामाजिक उद्यमी महिला सहकारी संस्थाले मिलाएको हो । कृषकले उत्पादन गरेका खसीविक्री गाउँपालिका बाहिर विक्री भएको सहकारीका अध्यक्ष शारदा आलेले जानकारी दिनुभयो । उहाँका अनुसार ५३ वटा खसीबोका विक्री गर्दा रु सात लाख ४१ हजार ८ सय ३३ आम्दानी भएको छ ।
खसी विक्री गरेर स्थानीय कृषक होमबहादुर थापाले पाँच वटा खसी बेचेर रु एक लाख ६ हजार तीन सय ३० आम्दानी गर्नुभएको छ । उहाँले पाँच वटा खसी विक्री गर्नुभएको छ । स्थानीय तिलसरा थापाले दुई वटा खसी बेचेर रु ५३ हजार ७ सय ६० र विष्णुमाया थापाले दुई वटा खसी बेचेर रु ४५ हजार एक सय ४० आम्दानी गर्नुभएको छ । यहाँका कृषकको मुख्य आम्दानीको स्रोत बाख्रापालन हो । सहकारीले गत हप्ता मात्रै रु दश लाख २३ हजार एक सय ३९ बराबरको खसीबोका विक्री गरेको थियो ।
“दशैंलाई लक्षित गरी करिब रु १८ लाख बराबरको खसी गाउँपालिका बाहिर विक्री भएको छ,” सहकारीका अध्यक्ष आलेले भन्नुभयो, “कृषकलाई बजारको समस्या छैन, सहकारीले बजारीकरणको व्यवस्था मिलाउँदै आएको छ ।”
जिल्लाका ग्रामीण भेगका कृषकहरुले यस वर्षको दशैंमा करीब दुई करोड बराबरको खसीबोका विक्री गरिसकेका छन् ।
