निष्पक्ष र विश्वसनीय खबरको सँगालो 
Khabar Punja
१२ मंसिर २०८१, बिहीबार
तनहुँ : नेपाली काङ्ग्रेसका केन्द्रीय सदस्य प्रदीप पौडेलले सरकारले चुनाव नचाहेको आरोप लगाउनुभएको छ । ४५ औ राष्ट्रिय एकता तथा मेलमिलाप दिवसको अवसरमा नेपाली काङ्ग्रेस तनहुँले आज आयोजना गरेको कार्यक्रममा सम्बोधन गर्दै पौडेलले चुनावको मिति नाटक मात्रै भएको टिप्पणी गर्नुभयो ।
केन्द्रीय सदस्य पौडेलले संवैधानिक निकायहरुमा असंवैधानिक तवरबाट पदाधिकारी नियुक्त गर्ने मात्रै नभई प्रतिनिधिसभा विघटन गरेर सरकारले स्वेच्छाचारी काम गरिरहेको बताउनुभयो । काङ्ग्रेसलाई जनताले पाँच वर्षसम्म प्रतिपक्षमा बस्न मत दिएकाले सत्ता काङ्ग्रेसका लागि प्यारो नभएको पौडेलको भनाई थियो ।
आमन्त्रित केन्द्रीय सदस्य धु्रव वाग्लेले हार्दिकता र एकता कायम गरी पार्टीलाई बलियो बनाउनुपर्नेमा जोड दिनुभयो । जिल्ला सभापति बैकुण्ठ न्यौपानेले पद्धतिमा भन्दा व्यक्तिमा विश्वास गर्ने राजनीतिले सङ्कट निम्त्याउने बताउनुभयो ।
कार्यक्रममा पार्टीका सचिव विश्व बास्तोला, समन्वय समितिका उपप्रमुख पवित्रा पौडेल लगायतले जननायक बीपी कोईराला, राष्ट्रियता, लोकतन्त्र संरक्षणको लागि एक ठाउँमा उभिनुपर्छ भन्ने सन्देश अहिलेको अवस्थामा पनि सान्दर्भिक रहेकोमा जोड दिनुभयो ।
