Khabar Punja

दुलेगौडा : शुक्लागण्डकी नगरपालिकाको केन्द्र दुलेगौँडा बजारदेखि गाउँफर्कोदय मावि ढोरफिर्दीको खेल मैदानसम्म सरसफाई शुरु गरिएको छ । शुक्लागण्डकी नगरपालिकाद्धारा आयोजित प्रथम मेयर कप गण्डकी प्रदेशका पालिकास्तरीय पुरुष भलिबल प्रतियोगिताको पूर्वसन्ध्यामा नगरपालिकामा कार्यरत कर्मचारीको आयोजनामा सरसफाई थालिएको हो ।

सबै शाखाका कर्मचारी सरसफाई अभियानमा सहभागी भएको प्रमुख प्रशासकीय अधिकृत गंगालाल सुवेदीले बताउनुभयो । सडक आसपासका फोहोर उठाउने र खाल्डाखुल्डी पुर्ने उहाँको भनाई छ । शुक्रबारदेखि क्लागण्डकी–८ ढोरफिर्दीस्थित गाउँफर्कोदय माविको खेल मैदानमा मेयर कप शुरु हुँदैछ । प्रतियोगितामा हालसम्म २० टिमले सहभागिता जनाउनका लागि टिम दर्ता गराएको मेयर कप सञ्चालन तथा व्यवस्थापन समिति संयोजक दिर्घ थापाले बताउनुभयो ।

प्रतियोगिताको विजेताले नगद एक लाख ५० हजार रुपैयाँको साथमा शिल्ड, मेडल र प्रमाणपत्र पाउनेछ । दोस्रो, तेस्रो र सान्त्वनाले क्रमश: एक लाख, ५० हजार र २५ हजार रुपैयाँको साथमा शिल्ड, मेडल र प्रमाणपत्र पाउनेछन् ।सर्वोत्कृष्ट खेलाडीले १० हजार रुपैयाँ प्राप्त गर्ने जनाईएको छ । विधागततर्फ बेष्ट स्पाईकर, सेन्टर सर्वर, ब्लकर र डिफेन्डरले जनही पाँच हजार रुपैयाँ हात पार्नेछन् ।