निष्पक्ष र विश्वसनीय खबरको सँगालो 
Khabar Punja
२२ बैशाख २०८१, शनिबार
दमाैली । छोरीहरुले किरिया बस्नुहुन्न भन्ने सामाजिक कुरिती अझैपनि छ । तर तनहुँको म्याग्दे गाउँपालिका–३ का छोरीहरुले भने उक्त कुरितीलाई चुनौति दिँदै बुबाको किरियामा बसेका छन् ।
किलचोकस्थित मुस्कान श्रेष्ठ र खुसी श्रेष्ठले बुबा स्व. पदमकुमार श्रेष्ठको निधनमा किरिया बसेका हुन् । साउन ११ गते श्रेष्ठको निधन भएपछि छोरीहरु किरियामा बसेका हुन् ।
सामाजिक परम्परा अनुसार छोरा किरिया बस्ने प्रचलन भएतापनि मृतकका छोरा २० महिनाको मात्र रहेकाले छोरीहरु नै किरियामा बसेको मुस्कानले बताइन् । “समाज रुपान्तरणमा छोरा र छोरी दुवैको समान भूमिका हुन्छ, बुबाको किरियामा हाम्रो पनि भूमिका रहन्छ,” उनले भनिन् ।
घरको अभिभावक बितेपछि अब कसरी जीवन बिताउने भन्ने समस्या थपिएको मृतकका श्रीमती सुजिता श्रेष्ठले बताइन् ।
यसैबीच मृतकका परिवारलाई समवेदना व्यक्त गर्न पुग्नुभएका तनहुँ क्षेत्र नम्बर २ का प्रतिनिधि सभा सदस्य केदार सिग्देल, म्याग्दे गाउँपालिकाका अध्यक्ष श्रीप्रसाद श्रेष्ठले छोरीहरुको सहासले समाज रुपान्तरणमा महत्वपूर्ण सन्देश दिएको बताए ।
