Khabar Punja

भिमाद । तनहुँकी उद्यमी महिला धनु राना आफ्नो बुवाको किरियामा बसेकी छन् । बुबा लिल बहादुर रानाको मृत्यु भएपछि राना माईतीघर भिमाद रघुमा किरिया बसेकी हुन्।

बुवाआमाको अन्तिम संस्कारमा सन्तानको बराबरी दायित्व हुन्छ भन्ने सन्देश दिन आफु १३ दिन किरियामा बसेको धनुले बताइन् । “दाई जस्तै म पनि बुवाको सन्तान हुँ, बुवाको काजकिरिया गर्नु मेरो दायित्व हो, फेरि मेरो दाई मृगौलाको बिरामी हुनुभएकोले डायलिसिसका लागि अस्पताल गैरहनुपर्ने भयो, त्यसैले म किरियामा बसेको हुँ” धनुले भनिन् “कतिपयले मलाई छोरी किन किरिया बस्नुपर्यो ? बस्नु हुदैंन भनिरहनु भएको थियो । छोरा छोरी दुवै बराबरी हुन् भन्ने समाजले बुझ्नुपर्छ ।”

नेपाल घरेलु तथा साना उद्योग महासंघ, महिला उद्यमी जिल्ला कार्यसमिति तनहुँका सदस्य समेत रहेकी धनुले मृत्यु भएपछि मात्रै होईन जीवित हुँदा पनि बुवाआमाको हेरचाह र उपचारमा छोरा र छोरी दुवैले समान सहभागिता जनाउनुपर्ने विचार व्यक्त गरिन् ।

भिमाद नगरपालिकाका पुर्व मेयर मेख बहादुर थापाले बुवाआमाप्रति छोरा र छोरीको बराबरी हक र बराबरी कर्तव्य हुने बताए । “हाम्रो पुरानो प्रचलनमा बिहे गरिसकेका छोरीहरु आफ्ना बाबा र आमाको मृत्युमा ५ दिन मात्रै किरिया गर्ने चलन छ तर धनु रानाले रघु गाउँमा पहिलोपटक १३ दिनसम्म छोराले जस्तै विधि पुरा गरी किरिया बस्नुभएको छ, यसले गाउँमा उदाहरणीय सुरुवात गरेको छ,” थापाले भने ।

नेपाल घरेलु तथा साना उद्योग महासंघ, महिला उद्यमी जिल्ला कार्यसमिति तनहूँका अध्यक्ष कल्पना गौलीले महिला उद्यमी धनुको साहसिक कदमले छोरा र छोरी समान् हुन् भन्ने सोच समाजमा स्थापित गर्न प्रेरणा प्रदान गरेको बताइन् ।

सूचना: www.khabarpunja.com मा प्रकाशित सामग्रीहरु हुबहु वा तोडमोड गरी प्रकाशित गरेको अवस्थामा प्रतिलिपि अधिकार ऐन २०५९ आकर्षित हुनेछ । अनाधिकृत तवरले प्रकाशन गरेको भेटिएमा कानूनी कारवाहीको प्रक्रिया थालिनेछ ।