निष्पक्ष र विश्वसनीय खबरको सँगालो 
Khabar Punja
१० मंसिर २०८१, मंगलवार
दमौली । धादिङको ज्वालामुखी गाउँपालिका-७ का ४१ वर्षीय तकबहादुर नेपाली सोमबार मोटरसाइकलमा पोखरा जॉदै थिए । ग ६ प ६६९२ नम्बरको मोटरसाइकलमा सवार नेपालीले मोटरसाइकल पछाडी झोला राखेका थिए ।
चितवनबाट पोखरा आउँदै गरेका उनको तनहुँको व्यास-१ अम्रेनीमा आइपुग्दा झोला खस्यो । झोलामा थियो नगद एक लाख ७३ हजार सहित अन्य कागजात ।
झोला हराएको बारेमा नेपालीले जिल्ला प्रहरी कार्यालय तनहुँमा खबर गरे । उक्त झोला सोमबार राति नै चितवनको भरतपुर महानगरपालिका-१ रामबजार बस्ने २९ वर्षीय कृष्ण बहादुर कुंवरले फेला पारेका थिए । झोला खोलेर हेर्दा पैसा देखेपछि उनले तत्कालै उक्त झोला प्रहरी कार्यालयमा बुझाए ।
उक्त झोला प्रहरीले मंगलबार सम्बन्धित व्यक्तिलाई बुझाएको प्रहरी नायब उपरिक्षक युवराज खड्काले जानकारी दिए । ‘झोला फेला पार्ने व्यक्तिमा इमानदारिता देखियो, उहॉलाई विशेष धन्यवाद छ,’ उनले भने ।
