Khabar Punja

काठमाडौ । गायक प्रकाश सपूतले ‘सकम्बरी’ (फूलमाया) शीर्षकको गीत भिडियोसहित युट्युबमा सार्वजनिक गरेका छन् । 

बिहीवार दिउँसो सार्वजनिक यो उनको चार महिनापछिको अफिसियल गीत हो । ​

युट्युबमा सार्वजनिक गर्नुअघि उनले यो गीत गत मंगलवार डिस होमको एपमा सार्वजनिक गरेका थिए । गीतलाई लिएर मंगलवारबाटै सांगीतिक वृत्तमा एक खालको चर्चा सुरु भएको थियो । 

यो गीतमा प्रकाशकै शब्द, लय र स्वर छ । सुदिप सागरको संगीत संयोजन रहेको गीतमा बर्ता गन्धर्वको समेत स्वर छ ।  

प्रकाशले आफ्नै कथा एवं निर्देशनमा तयार पारेको यसको भिडियोमा पनि उनी प्रस्तुत छन् । साथमा कुसुम शर्मा, सुनिल थापा, निक्स शर्मा, सरिता राजोपाध्याय, संजोग रसाईली, सरस्वती अधिकारी, सालिक भण्डारी लगायतलाई भिडियोमा हेर्न सकिन्छ ।

प्रकाशले चलन चल्तीका गीतभन्दा बाहिर रहेर अलग–अलग मुद्धालाई आफ्नो साङ्गीतिक खुराक बनाएर पेस गर्दै आइरहेका छन् । ‘सकम्बरी’मा पनि उनले नयाँ विषयवस्तु समेटेका हुन् ।

यसपटक उनले राम्रो कलाकार बन्ने सपना बोकेर गाउँबाट सहर छिरेकी एक युवतीको कथा भिडियोमा पेस गरेका छन् । अभावले मानिसलाई के–के गर्न समेत बाध्य बनाउँछ र अर्काको अभावमा अवसरवादीहरु कसरी खेल्छन् भन्ने सन्देश गीतमा छ । 

भिडियो युट्युबमा सार्वजनिक गर्दै प्रकाशले समीक्षा गर्ने जिम्मा स्रोता दर्शकमा सुम्पिएका छन् । ‘फूलमायादेखि सकम्बरीसम्मको यात्राको समीक्षा गर्ने जिम्मा तपाईँको । उनि कति सही र कति गलत छिन् ? तपाई हाम्रो दृष्टिकोण कति सही छ र कति गलत छ ? त्यो विश्लेषण गर्ने जिम्मा पनि तपाईँको’ प्रकाश लेख्छन् – ‘हाम्रो सिर्जनात्मक प्रयासलाई सुझाव दिने, माया र हौसला दिने जिम्मा पनि तपाईँको । अब हाम्रो काम सकियो, सबै तपाईँको ।’

नवराज उप्रेतीको छायाँकन रहेको यसको भिडियोलाई प्रविन भट्टले सम्पादन गरेका हुन् ।