निष्पक्ष र विश्वसनीय खबरको सँगालो 
Khabar Punja
८ मंसिर २०८१, आईतवार
पोखरा । गण्डकी प्रदेशका प्रमुख पृथ्वीमान गुरुङले नयॉ सरकार गठनका लागि दावी पेश गर्न आव्हान गरेपनि मुख्यमन्त्री को हुने भन्ने अझै टुंगो लागेको छैन । कांग्रेस र माओवादी दुवै आफ्नो नेतृत्वमा सरकार गठन गर्ने कसरतमा छन् ।
तनहुँ-१ को उपनिर्वाचन हुनु अघि बालुवाटारमा कांग्रेस नेताहरुसहितको बैठकले गण्डकीमा पहिले माओवादीले नेतृत्व लिने सहमति भएको थियो । तर उपनिर्वाचनमा कांग्रेसका गोविन्द भट्टराईले हारेपछि परिस्थिति बदलिन सक्ने संकेत देखा परेको छ ।
कांग्रेसका सांसदहरुले उपनिर्वाचनमा माओवादीले सहयोग नगरेको भन्दै माओवादीलाई मुख्यमन्त्री नदिने भन्दै काठमाडौ पुगेर सभापति शेरबहादुर देउवा लगायतका नेताहरुसँग भेटेका छन् । कांग्रेस संसदीय दलका नेता सुरेन्द्र पाण्डे काठमाडौमा छलफलपछि पोखरा फर्किएका छन् । उनले आफू नै पहिले मुख्यमन्त्री हुने दावी गरेका छन् ।
तर माओवादी केन्द्रका संसदीय दलका नेता हरिबहादुर चुमान भने मंगलबार काठमाडौ पुगेका छन् । उनले बालुवाटारमा भएको सहमति कार्यान्वयन हुनुपर्ने भन्दै पहिलो नेतृत्व आफूहरुले पाउनुपर्ने बताएका छन् । चुमानले प्रधानमन्त्री पुष्पकमल दाहालसँग भेट्ने कार्यक्रम छ ।
प्रदेश प्रमुखले आव्हान गरेको दावी बिहीबार सकिदैछ ।
