निष्पक्ष र विश्वसनीय खबरको सँगालो 
Khabar Punja
१३ माघ २०८१, सोमबार
एजेन्सी । लियोनल मेसी इन्टर मियामी पुगेपछि लगातार गोल यात्रा जारी राखेका छन्। उनले टिमको पाँचौं जितमा गोल गरे। मेसीप्रेरित खेलमा इन्टर मियामीले लिग्स कप फुटबलको सेमिफाइनलमा स्थान पक्का गर्याे।
शनिबार बिहान भएको खेलमा चारलोटे एफसीलाई डिआरभो पिएनके रंगशालामा ४-० ले पराजित गर्दै मियामी पहिलो पटक सेमिफाइनल प्रवेश गर्न सफल भएकाे हाे।
डेभिड बेकह्यामको इन्टर मियामीलाई अन्तिम चारमा पुर्याउने क्रममा जोसेफ मार्टिनेजले पेनाल्टीमार्फत् १२ औं मिनेटमा अग्रता दिलाए।
लियोनल मेसी पुन: एकपटक पेनाल्टी प्रहारको अवसर मार्टिनेजलाई दिएका थिए। टिमका लागि दोस्रो गोल रोबर्ट टेलरको नाममा रह्यो। टेलरले ३२ औं मिनेटमा गोल गर्दै उनले पहिलो हाफमा नै टिमलाई २-० को अवस्थामा पुर्याए। लिग्स कपमा टेलरको यो चौंथो गोल हो।
दोस्रो हाफमा अग्रता थप फराकिलो पार्ने क्रममा आत्मघाती गोलमार्फत् इन्टर मियामीले तेस्रो गोल गरेको थियो।
निर्धारित समय सकिन २० मिनेटभन्दा कम समय बाँकी रहँदा एडिलसन मालान्डाले बल क्लियरको प्रयासमा आफ्नै पोस्टमा गोल गर्दा मियामी ३-० ले अघि रह्यो।
टिमका लागि चौंथो गोल लियाेनल मेसीको नाममा रह्यो। मेसीले टिमका लागि चौंथो गोल गर्दै अमेरिकामा निरन्तर गोल यात्रा जारी राखे।
उनले ८६ औं मिनेटमा लियोनार्ड काम्पानाको सानदार पासलाई सहज गोलमा परिणत गरेका थिए। मेसीको यो इन्टर मियामीमा आठौं गोल हो भने टिमको लगातार पाँचौं जितसमेत हो।
