निष्पक्ष र विश्वसनीय खबरको सँगालो 
Khabar Punja
१६ बैशाख २०८१, आईतवार
दमाैली । नेपाल प्रहरी श्रीमती सङ्घको आयोजनामा तनहुँको देवघाटमा आज सम्पन्न स्वास्थ्य शिविरबाट करिब पाँच सय सर्वसाधारण लाभान्वित भएका छन् ।
चितवन मेडिकल कलेजको प्राविधिक सहयोगमा देवघाट गाउँपालिका–५ धर्मार्थ अस्पतालमा आयोजित शिविरमा चार सय ९० जनाले सेवा लिएका हुन् ।
शिविरमा चितवन मेडिकल कलेजका विशेषज्ञ डाक्टरहरुद्वारा नाक, कान, घाँटी, आँखा, मुटु, दम, दाँत, स्त्रीरोग, इसिजी, युएसजि, हार्डजोर्नी र थेरापी सम्बन्धी सेवा प्रदान गरिएको नेपाल प्रहरी श्रीमती सङ्घका अध्यक्ष लक्ष्मी कुंवरले जानकारी दिइन्।
सोही अवसरमा देवघाट गाउँपालिका–५ स्थित देवघाट समाजकल्याण केन्द्र वृद्धाश्रम, गलेश्वर आश्रम, हरिहर आश्रम र महेश आश्रममा रहनुभएका एक सय ९० वृद्धवृद्धालाई कम्मल वितरण गरिएको थियो ।
कार्यक्रममा नेपाल प्रहरी श्रीमती सङ्घ गण्डकी प्रदेश अध्यक्ष कमला खनाल, तनहुँका प्रहरी उपरिक्षक अवदेश विष्ट, गाउँपालिकाका जनप्रतिनिधि लगायतको सहभागिता थियो ।
