निष्पक्ष र विश्वसनीय खबरको सँगालो 
Khabar Punja
२० कार्तिक २०८१, बुधबार
दमाैली । पृथ्वीराजमार्ग अन्तर्गत तनहुँको व्यास नगरपालिका–१ अम्रेनीमा सोमबार ट्याङ्करको ठक्करबाट मृत्यु भएका २९ वर्षीय प्रविण कैनीका आफन्तजनले आज पनि राजमार्ग अवरुद्ध गरेका छन् ।
सोमबार भएको दुर्घटनामा मृत्यु भएका कैनीका आफन्तजनले आज १२ः३० देखि पुनः राजमार्ग अवरुद्ध गरेका हुन् । हिजो दिउँसो ३ बजेदेखि राजमार्ग अवरुद्ध भएकामा चार बुँदे सहमतिसँगै राति १० बजेदेखि बाटो सुचारु भएको थियो ।
छलफलबाट चिनियाँ प्रोजेक्ट म्यानेजरसँग थप वार्तामा बस्ने, ट्याङ्कर चालकलाई हदैसम्मको कारबाही गर्ने, पीडित परिवारलाई उचित क्षतिपूर्ति प्रदान गर्ने, दुर्घटनास्थलमा माटो हालेर पुर्नेलाई कारबाही गर्ने सहमति भएपनि सहमति कार्यान्वयन नभएको भन्दै पीडित आन्दोलनमा उत्रिएका हुन् ।
दमौलीबाट घाँसीकुवातर्फ जाँदै गरेको ट्याङ्करले सोही दिशातर्फ जाँदै गरेको ग १९ प ८३०३ नम्बरको मोटरसाइकललाई ब्याक गरेर ठक्कर दिएको थियो । दुर्घटनामा कैनीको घटनास्थलमै मृत्यु भएको थियो ।
