निष्पक्ष र विश्वसनीय खबरको सँगालो 
Khabar Punja
८ मंसिर २०८१, आईतवार
दमाैली । तनहुँको व्यास नगरपालिकाले नगरभित्रका सामुदायिक विद्यालयमा निःशुल्क शिक्षा प्रदान गर्न अध्ययन गर्ने भएको छ । नगरप्रमुख वैकुण्ठ न्यौपानेको अध्यक्षतामा आज सम्पन्न कार्यपालिका बैठकले सामुदायिक विद्यालयहरूलाई निःशुल्क शिक्षा प्रदान गर्न विद्यमान अवस्थाको अध्ययन गर्ने निर्णय गरेको हो ।
त्यसका लागि एक महिनाभित्र प्रतिवेदन पेश गर्न शिक्षा शाखालाई निर्देशन दिने निर्णय भएको नगरपालिकाका प्रवक्ता जीवन गुरुङले जानकारी दिए ।
बैठकले स्थानीय भू–उपयोग अन्तर्गत जग्गा वर्गीकरणको प्रक्रिया अघि बढाइएकाले असोज मसान्तसम्म गैह्रकृषि जग्गालाई आवसीय क्षेत्र मानी भू–उपयोग नियमावली अनुसार कित्ताकाट सहजीकरण गरिदिन मालपोत कार्यालय तनहुँ र नापी कार्यालय तनहुँलाई जानकारी सहित अनुरोध गर्ने निर्णय गरेको उनले बताए ।
यस्तै व्यास नगरपालिका भित्र फोहर वर्गीकरण गरी बिसर्जन गरिने कुहिने फोहर व्यवस्थापनलाई अझ प्रभावकारी बनाउन आवश्यक पूर्वाधार निर्माण गर्ने निर्णय भएको छ ।
बैठकले व्यास नगरपालिका अन्तर्गतका सुत्केरी सट्टाशिक्षक व्यवस्थापन कार्यविधि २०८१, विपन्नहरुका लागि सुरक्षित आवास सहयोग कार्यविधि २०८१, निर्माण व्यवसायी सम्बन्धी कार्यविधि २०७५ लाई पारित एवं संशोधन गर्ने निर्णय गरेको छ ।
बैठकले मुख्यमन्त्री नवप्रवद्र्धन कार्यक्रम अन्तर्गत ऐतिहासिक तनहुँसुर क्षेत्र संरक्षण र विकास परियोजना कृषि तथा पर्यटन प्रवद्र्धन कार्यक्रम प्रस्ताव गर्ने निर्णय गरेको प्रवक्ता गुरुङले जानकारी दिनुभयो ।
त्यस्तै भदौ २१ गतेका दिन हरितालिका तीजका अवसरमा नगरस्तरीय तीज गीत प्रतियोगिता आयोजना गर्न उपप्रमुख इन्दिरा दरैको संयोजकत्वमा नौ सदस्यीय आयोजक समिति गठन गरिएको छ ।
बैठकले साउन २५ गते विश्व आदिवासी जनजाति दिवसका अवसरमा नगरभित्र सार्वजनिक बिदा दिने निर्णय गरेको छ ।
