निष्पक्ष र विश्वसनीय खबरको सँगालो 
Khabar Punja
१२ मंसिर २०८१, बिहीबार
चितवन । तनहुँको ऑबुखैरेनीस्थित ऐनापहरामा बस दुर्घटनामा परेर मृत्यु भएकाहरुको शव भारत लगिएको छ । भरतपुर अस्पतालमा शव परीक्षण सकेपछि भारतीय एयरफोर्सको जहाजबाट आज अपरान्ह भरतपुर बिमानस्थलबाट भारत लगिएको हो ।
मृतक २७ मध्ये २५ जनाको शव जहाजबाट लगिएको चितवनका प्रमुख जिल्ला अधिकारी इन्द्रदेब यादवले जानकारी दिए । उनका अनुसार बसका चालक र सहचालकको शव भने स्थलमार्गबाट गोरखपुरतर्फ लगिएको छ ।
दुई शव एम्बुलेन्स मार्फत भैरहवा नाका हुँदै लगिएको उनले बताए । मृतकको शव लिन भारतकी युवा तथा खेलकुद राज्यमन्त्री रक्षा निखिल खड्से पनि भरतपुर आएकी थिइन् । उनीपनि सोही जहाज चढेर गएकी छन् ।
मृतक यात्रुका शव शुक्रबार रातीनै ऑबुखैरेनीबाट भरतपुर ल्याइएको थियो । पोखराबाट काठमाडौं जाँदै गरेको भारतीय पर्यटक बोकेको बस शुक्रबार बिहान ११ः३० बजेको समयमा तनहुँको आबुखैरेनी नजिकै सडकबाट मर्स्याङ्दी नदीमा खस्दा पशुपतिनाथमा दर्शनका लागि हिडेका २७ पर्यटकको मृत्यु भएको हो । मृतकमध्ये १५ जना महिला, ११ जना पुरुष र एक जना चार बर्षकी बालिका रहेकी छन । घाइते हुनेहरुमा ६ जना पुरुष र १० जना महिला रहेका छन ।
प्रहरीका अनुसार बसमा सवार ४३ जना सवार थिए । घाइतेहरुको काठमाडौंमा उपचार भइरहेको छ । मृतक र घाइते हुनेमा भारतको महाराष्ट्रको जलगाउँ जिल्लास्थित भुसावल गाउँका हुन ।
