निष्पक्ष र विश्वसनीय खबरको सँगालो 
Khabar Punja
१७ माघ २०८१, शुक्रबार
दमाैली । ब्लड क्यान्सर पीडित भानु नगरपालिका-१३ पोखरीछाप निवासी ५३ वर्षीया जमुनामाया गुरुङको उपचारका लागि सहयाेग जुट्ने क्रम सुरु भएकाे छ । आर्थिक अभावमा उपचारमा समस्या भएकाे समाचार प्रकाशन भएपछि गुरुङकाे उपचारका लागि विभिन्न व्यक्ति तथा सङ्घसंस्थाले सहयाेग गर्न थालेका हुन् ।
सामाजिक अभियान्ता गल गुरुङले उनकाे उपचारका लागि सहयाेग अभियान सुरु गरेका थिए ।
गुरुङकाे उपचारका लागि पाेखरीछापबाट रु एक लाख ३५ हजार सात सय ९५ र चाम्पानी सतिस्वाँराबाट दश हजार निजका बुहारी विपना गुरुङलाई शनिबार हस्तान्तरण गरिएकाे छ ।
त्यस्तै गैरीस्वारा घर भई वैदेशिक रोजगारीमा रहेका दिल गुरुङले ६ हजार सहयोग गरेका छन् ।
भानु-१३ सम्जुर हाल बेशीशहर निवासी नसुरदिन मिया र भानु १३ निवर्तमान वडा सदस्य समिना बेगमबाट रु तीन हजार, सान कन्सल्टेन्सीका प्रबन्ध निर्देशक नजरत अलीले रु दुई हजार सहयाेग गरेका छन् ।
भानु-१३ तिनघरे हाल नेपाली सेनामा कार्यरत सुबेदार सम्भु अधिकारीबाट रु तीन हजार, भानु-१३ चन्द्रावती हाल रोजगारीको सिलसिलामा प्रवासमा रहेका अर्जुन खडकाले रु पाँच हजार सहयाेग गरेकाे गल गुरुङले जानकारी दिए ।
गुरुङकाे उपचारमा सहयाेग गर्न उनको परिवारले आग्रह गरेकाे छ । निजका श्रीमान् चित्रबहादुर गुरुङले श्रीमतीकाे उपचारमा सहयाेग गरिदिन सबैलाई आग्रह गरेका छन् ।
केही महिना यता बिरामी भएको र जाँच गर्न जाँदा उनलाई ब्लडक्यान्सर भएको पत्ता लागेको थियाे । नेपालको विभिन्न अस्पतालहरुमा उपचार हुन नसकेपछि उनलाई भारतको राजधानी दिल्ली स्थित एक अस्पतालमा रिफर गरिएकाे थियाे । पैसाको अभावमा उपचार गर्न जान नसिकएकाे निजका श्रीमान् चित्रबहादुरले बताए ।
