Khabar Punja

दमाैली । भूतपूर्व सैनिक क्लव दमौलीले वार्षिकोत्सव मनाएको छ । क्लवले आज व्यास नगरपालिका–३ स्थित खुल्लामैदानमा विविध कार्यक्रम गरी वार्षिकोत्सव मनाएको हो ।

कार्यक्रमअघि दमौली बजारमा पदयात्रा निकालिएको थियो । पदयात्रामा भूतपूर्व सैनिकको सहभागिता रहेको थियो ।

वार्षिकोत्सवको अवसरमा आयोजित डोरी तान प्रतियोगितामा भूतपूर्व सैनिक क्लव विजयी भएको छ । पतञ्जली योग समितिलाई २–१ सेटले हराउँदै क्लव विजयी भएको हो । पहिलो सेट पतञ्जलीले जितेकामा दोस्रो र तेस्रो लगातार सेट भूतपूर्व सैनिक क्लवले जितेको छ । विजेता भूपू सैनिक क्लवले रु पाँच हजार पाँच सय र उपविजेता पतञ्जलीले रु तीन हजार नगद पुरस्कार प्राप्त गरेको छ ।

त्यस्तै म्युजिकल चियरमा मनिता थापा प्रथम, जमुना श्रेष्ठ द्वितीय र अप्सरा छिमाल तृतीय भएका छन् । विजयीहरुले क्रमशः रु एक हजार, रु सात सय र रु पाँच सय नगद पुरस्कार प्राप्त गरेका छन् ।

क्लवका अध्यक्ष क्या. तारालाल मल्लको अध्यक्षतामा भएको कार्यक्रममा व्यास नगरपालिकाका प्रमुख वैकुण्ठ न्यौपानेले भूपूहरुले समाजमा पुर्याएको योगदान सराहनीय रहेको बताए ।