Khabar Punja

दमाैली । राष्ट्रिय प्रजातन्त्र पार्टीका केन्द्रीय अध्यक्ष राजेन्द्र लिङ्देनले पार्टीमा जनताको आकर्षण बढेको बताएका छन् । राष्ट्रिय प्रजातन्त्र पार्टी तनहुँले दमौलीमा बुधबार आयोजना गरेको कार्यकर्ता भेटघाटलाई सम्बोधन गर्दै अध्यक्ष लिङ्देनले पार्टीमा दिनदिनै जनताको प्रवेश बढिरहेकाले आकर्षण बढेको पुष्टि भएको उल्लेख गरे।

उनले भने, “अहिले पार्टीमा प्रवेश कार्यक्रम दिनदिनै भइरहेको छ । बिहानदेखि रातिसम्म प्रवेश कार्यक्रम भइरहेको छ । यो पार्टीप्रतिको विश्वास हो ।” पार्टीमा प्रवेश गरेकालाई उचित जिम्मेवारी दिइने बताउँदै अध्यक्ष लिङ्देनले पार्टीप्रति जनताको भरोसा टुट्न नदिने बताए ।

अध्यक्ष लिङ्देनले पार्टीमा प्रवेश गरेकाले कहिल्यै पनि पश्चाताप गर्न नपर्ने बताए। उनले भने, “पार्टी प्रवेश गरेकाहरुले कहिल्यै पनि गलत गरिएछ भन्ने आभाष हुन दिइनेछैन ।”

उनले वर्तमान सरकारले भ्रष्टाचार न्यूनीकरण र सुशासनका पक्षमा काम गर्नुपर्ने बताउनुभयो । अध्यक्ष लिङ्देनले वर्तमान सरकारले मूल्यवृद्धि नियन्त्रण, रोजगारी सिर्जना लगायतका क्षेत्रमा काम गर्नुपर्ने बतए । सरकारले जनभावना अनुसार काम गर्दै जनताको मन जित्न सक्नुपर्नेमा अध्यक्ष लिङ्देनको जोड थियो । अध्यक्ष लिङ्देनले भने, “अहिले सिमेन्टमा मूल्यवृद्धि भएको छ । मूल्यवृद्धि तत्कालै फिर्ता लिनुपर्छ ।

अध्यक्ष लिङ्देनले सरकार बन्नुअघि दुई ठूला पार्टीले संविधान संशोधनको कुरा गर्दा आफूहरुलाई ठिकै लागेको बताउँदै थपे, “संविधानमा नमिलेका थुप्रै कुराहरु छन् । जसले गर्दा देशमा स्थिरता पनि हुँदैन, विकास पनि हुँदैन । संविधान संशोधन गर्नैपर्ने छ ।”

राप्रपा जिल्ला अध्यक्ष विनाेद घर्तीले पार्टीका अध्यक्षलाई जिल्ला कार्यसमितिले गरेका कामकारवाही बारे जानकारी गराएका थिए ।