निष्पक्ष र विश्वसनीय खबरको सँगालो 
Khabar Punja
१९ चैत्र २०८१, बिहीबार
दमाैली, १८ चैत । राष्ट्रिय आदिवासी जनजाति महिला महासंघ जिल्ला समन्वय परिषद तनहुँको पुनर्गठन गरिएको छ । सोमबार दमौलीमा एक कार्यक्रमको आयोजना गरि ११ सदस्यीय राष्ट्रिय आदिवासी जनजाति महिला महासंघ जिल्ला समन्वय परिषद् तनहुँको गठन गरिएको हो ।
परिषद् तनहुँको अध्यक्षमा व्यास नगरपालिकाकी जमुना दरै सर्वसम्मत चयन अध्यक्षतामा चयन भएकी छन् । उपाध्यक्षमा भिमाद नगरपालिकाकी पवित्रा थापा, सचिवमा व्यास नगरपालिकाकी विष्णुमाया आले सहसचिवमा भानु नगरपालिकाकी पुनुमाया श्रेष्ठ, कोषाध्यक्षमा व्यास नगरपालिकाकी एलिजा गुरुङ, सदस्यहरूमा भानु नगरपालिकाकी राममाया कुमाल, भानु नगरपालिकाकी सबिना कुमाल, व्यास नगरपालिकाकी रिना बोटे, नगरपालिकाकी कान्छी माया तामाङ चयन भएका छन् ।
राष्ट्रिय आदिवासी जनजाति महासंघ गण्डकी प्रदेश समन्वय परिषद्को आयोजनामा सञ्चालित कार्यक्रम प्रदेश अध्यक्ष दिलुमाया गुरुङको सभापतित्वमा सम्पन्न भएको हो। उक्त कार्यक्रमको उद्घाटन व्यास नगरपालिकाका प्रमुख वैकुण्ठ न्यौपानेले गरेका थिए।
कार्यक्रमका प्रमुख अतिथि न्यौपानेले नेपालको इतिहासमा आदिवासी जनजातिको महत्त्वपूर्ण योगदान रहँदै आएको बताए ।उनले आदिवासी जनजाति महिलाहरु पनि नेतृत्व तहमा पुगेको स्मरण गर्दै महिला सशक्तिकरण व्यास नगरपालिकाको एजेन्डा भएको बताए ।
उक्त कार्यक्रममा गण्डकी प्रदेशका निवर्तमान सांसद सरिता गुरुङ, व्यास नगरपालिकाकी उपप्रमुख इन्दिरा दरै, भुजेल महिला समूहका केन्द्रीय अध्यक्ष बसुन्धरा घर्ती, म्याग्दे गाउँपालिकाका निवर्तमान प्रमुख मायादेवी राना, आदिवासी जनजाति महासंघ जिल्ला समन्वय परिषद् तनहुँका अध्यक्ष सुजित हिराचन, आदिवासी जनजाति महिला महासङ्घ कास्कीका उपाध्यक्ष मीनामाया तामाङ, सचिव मिलन भुजेल, अन्जना तामाङ लगायतले विक्रम सम्वत् २०६४ असोज २ गते स्थापना भएको सो संस्था क्रियाशील हुन नसक्दा पुनर्गठन गरिएको बताएका थिए।
सोही कार्यक्रममा आदिवासी जनजाति महिलाहरूको वर्तमान अवस्था, संस्थागत अभिमुखिकरण कार्यक्रम समेत गरिएको थियो । उक्त कार्यक्रमको सहजीकरण प्रशिक्षक हरिसिं गुरुङले गरेका थिए।
