निष्पक्ष र विश्वसनीय खबरको सँगालो 
Khabar Punja
१९ चैत्र २०८१, बिहीबार
दमौली, १८ चैत । व्यास नगरपालिकाभित्र सौन्दर्य व्यवसाय सञ्चालन गरेका महिलाहरूका लागि नेल आर्ट सम्बन्धी एडभान्स तालिम सञ्चालन गरिएको छ।
व्यास नगरपालिकाको आयोजना र तनहुँ सौन्दर्य व्यवसाय सङ्घको समन्वयमा तालिम सञ्चालन गरिएको हो । तालिममा ३० जना सौन्दर्य व्यवसायी महिलाहरूको सहभागिता रहेको छ आइतबारबाट सुरु भएको १० दिने उक्त तालिममा प्रशिक्षकहरू शिशिर थापा गोदार, शान्ता लामिछाने, हिमालादेवी गुरुङ, शान्ति गुरुङ, प्रभाव वैद्य भुजेलले कृत्रिम नङ जोड्ने तरिका, नङमा बुट्टा राख्ने तरिका लगायत नङको सुन्दरतासँग जोडिएका विभिन्न सीपहरूको बारेमा प्रशिक्षण दिने बताइएको छ।
तनहुँ सौन्दर्य व्यवसाय सङ्घीय अध्यक्ष मञ्जु पिया श्रेष्ठको अध्यक्षतामा आयोजित उद्घाटन कार्यक्रमलाई सम्बोधन गर्दै व्यास नगरपालिकाकी उपप्रमुख इन्दिरा दरैले सौन्दर्य व्यवसाय आर्थिक उपार्जनका हिसाबले राम्रो व्यवसाय भएको बताइन्।
सौन्दर्य व्यवसायका माध्यमबाट महिलाहरू आर्थिक रूपमा सक्षम बन्दै गएको उनको भनाइ थियो। आफूले गरेका हरेक व्यवसाय एवं पेशालाई सम्मानित स्थान दिनुपर्ने बताउँदै पेसा व्यवसायलाई निरन्तरता दिएको खण्डमा सफलता असम्भव नरहेको उनको भनाइ थियो। राम्रो हुने रुचि जो कोही मानिसलाई पनि हुने हुँदा आफ्नो पेशामा निखारता जरुरी हुने दरैले बताइन्। उक्त कार्यक्रममा तनहुँ सौन्दर्य व्यवसाय सङ्घकी सल्लाहकार निर्मला मल्ल, उपाध्यक्ष विष्णुमाया थापा लगायतले बोलेका थिए ।
