निष्पक्ष र विश्वसनीय खबरको सँगालो 
Khabar Punja
८ बैशाख २०८२, मंगलवार
काठमाडौ, ३ वैशाख । स्पेनिस महारथी बार्सिलोना ७ वर्षपछि युरोपियन च्याम्पियन्स लिग फुटबलको सेमिफाइनलमा प्रवेश गरेको छ । च्याम्पियनन्स लिगको दुई लेगमा समग्रमा ५–३ को जित निकाल्दै बार्सिलोना सन् २०१९ पछि अन्तिम चारमा स्थान बनाउन सफल भएको हो ।
बार्सिलोनाले सन् २०१९ पछि च्याम्पियन्स लिगको सेमिफाइनलमा स्थान बनाएको हो ।
मंगलबार राति डर्टमन्डको मैदानमा सम्पन्न दोस्रो लेगमा घरेलु टिमलाई जीत दिलाउन सेर्होउ गुइरासीले ह्याट्रिक गरे । तर, पहिलो लेगमा व्यहोरेको ४–० को हारका कारण डर्टमन्डले सेमिफाइनल यात्रा भने तय गर्न सकेन । बार्सिलोनाले डर्टमन्डकै खेलाडीबाट एक गोल आत्मघाती उपहार पाएको थियो ।
लिगको फाइनलमा पुग्न बार्सिलोनाले अब इन्टर मिलान र बायर्न म्युनिखबीचको विजेतासँग प्रतिस्पर्धा गर्नेछ ।
मंगलबार राति नै भएको खेलमा एस्टन भिल्लाले पेरिस सेन्ट जर्मेन (पीएसजी)लाई हरायो । यद्यपि, समग्रमा ५–४ को जित निकाल्दै पीएसजी नै सेमिफाइनलमा स्थान बनाउन सफल भएको हो । घरेलु मैदानमा भएको पहिलो लेगमा भने पीएसजी ३–१ ले विजयी भएको थियो ।
