निष्पक्ष र विश्वसनीय खबरको सँगालो 
Khabar Punja
८ जेष्ठ २०८२, बिहीबार
दुलेगौंडा, २४ वैशाख ।तनहुँको शुक्लागण्डकी नगरपालिका वडा नं. १० लोकदीटारका स्थानीयले टोलमा आधारभुत स्वास्थ्य केन्द्र स्थापनाको माग गर्दै शुक्लागण्डकी नगरपालिका कार्यालयको मुल प्रवेशद्धारमा चाबी लगाईदिएका छन् ।
चाबी लगाउने क्रममा स्थानीय, नेपाल प्रहरी र नगर प्रहरीबीच धकेलाधकेल भएको थियो । वडा र नगरबाटै सिफारिस गरेर आधारभुत स्वास्थ्य केन्द्र निर्माणकालागि मन्त्रालयबाट बजेट परेको भएपनि ढिलाई गरिएको भन्दै चाबी लगाएको स्थानीय एवम् माझ गाउँ टोल विकास संस्थाका अध्यक्ष कृष्ण बहादुर कुमालले बताए ।
गत मंसिर २५ गते लोकदीटारमा आधारभुत स्वास्थ्य केन्द्र आवश्यक परेको भन्दै वडा अध्यक्ष राजेन्द्र भट्टराई क्षेत्रीले स्वास्थ्य मन्त्रालयमा अगाडी बढाउन माग गर्दै नगरपालिकालाई माग पत्र पठाएका थिए ।
नगरपालिकाले सोहि दिननै मन्त्रालयमा केन्द्रका लागि सिफारिस गरेको पाइएको छ । हाल स्वास्थ्य सुधार कार्यक्रम अन्तर्गत आधारभुत स्वास्थ्य केन्द्र निर्माणकालागि बजेट आएपनि अन्यत्र लैजान लागिएको भन्दै उनीहरुले यसअघि पनि पटक पटक नगरको ध्यानाकर्षण गराएका थिए ।
पटक पटक वडा र नगरमा ध्यानाकर्षण गरायौ, तर हाम्रो क्षेत्रमा आएको केन्द्र अन्यत्र लैजान खोजिएको छ , नियमले मिल्दैन भन्नुभएको छ, जनप्रतिनिधी हामीसँग कुरै गर्न चाहानुहुन्न, अर्का स्थानीय सुदिप केसीले भने ।
उनले माग पुरा नभएसम्म चाबी नखुल्ने प्रष्ट पारे । उनले नगर प्रमुख कृष्णराज पण्डितले लोकतीटारमै केन्द्र स्थापना हुन्छ भनेर प्रतिवद्धता जनाएकोमा अहिले आएर प्रतिवद्धताबाट भागिरहेको टिप्पणी गरे । केसीले स्थानीय आउने बित्तिकै नगर प्रमुख कार्यालयबाट निस्किएर जाने गरेको बताए ।
नगर प्रमुख कृष्णराज पण्डितले कार्यपालिका बैठक लगत्तै चितवन आउनु परेकोले मंगलवार छलफल हुन नसकेको बताए । उनले आधारभुत स्वास्थ्य केन्द्रकै सेवा सरह लोकदीटारमा पूर्वाधारसहितको सेवा दिन नगर तयार रहेको प्रष्ट पारे ।
वडा नं. १० का अध्यक्ष राजेन्द्र बहादुर भट्टराई क्षेत्रीले एउटै वडामा आधारभुत स्वास्थ्य केन्द्र दुई स्थानमा स्थापना गर्न नमिल्ने भएकाले समस्या आएको बताए । अहिले छब्दीमा आधारभुत स्वास्थ्य चौकी सञ्चालनमा छ, सोहि ठाउँमा पुनः स्थापना गर्न मिल्दैन, हामीले शहरी स्वास्थ्य केन्द्र राख्ने भनेका हौं, उहाँहरु मान्नुभएको छैन ।
