निष्पक्ष र विश्वसनीय खबरको सँगालो 
Khabar Punja
२९ माघ २०८२, बिहीबार
दमौली, २६ माघ । तनहुँ–१ बाट राष्ट्रिय प्रजातन्त्र पार्टी (राप्रपा) का उम्मेदवार रामदत्त जोशी (अभिषेक) ले आफ्नो प्रतिष्पर्धी अरु उम्मेदवार नभई जनता रहेको बताएका छन् । उनले तनहुँ-१ का उम्मेदवार सबै गणतन्त्रवादी रहेको र आफूमात्रै राजसंस्थावादी र हिन्दुराष्ट्रवादी रहेको उल्लेख गरे ।
उनले आफू जित्नैपर्ने मानसिक दबाबमा नरहेको बताउँदै कति मानिसमाझ हाम्रो सन्देश जान्छ त्यसले अर्थ राख्ने बताए । राजसंस्था र हिन्दुराष्ट्र मुख्य एजेण्डा रहेको उल्लेख गर्दै उनले जनताले यसका लागि मत प्रकट गर्नुपर्ने बताए ।
उनले धार्मिक तथा सांस्कृतिक महत्व बोकेको तनहुँलाई विश्वमाझ चिनाउने प्रतिबद्धता व्यक्त गरे । व्यासभूमि र देवघाट जस्ता धार्मिक स्थलको उचित प्रचार–प्रसार गर्दै धर्म र संस्कृतिलाई विकासको आधार बनाइ देशलाई समृद्ध बनाउने आफ्नो योजना रहेको उनले बताएका छन्। धार्मिक पर्यटन प्रवर्द्धनमार्फत स्थानीय अर्थतन्त्र सुदृढ बनाउने र राष्ट्रिय पहिचानलाई अन्तर्राष्ट्रिय स्तरमा स्थापित गर्ने लक्ष्यसहित आफू चुनावी मैदानमा उत्रिएको जोशीको भनाइ छ।
सोमबार दमौलीमा पत्रकार सम्मेलन गरी जोशीले चुनावी आश्वासन बाँड्ने काममा आफू विश्वास नगर्ने उल्लेख गर्दै सम्भव र व्यवहारिक हुने आश्वासन मात्रै दिने स्पष्ट पारेका छन्। जनतासँग गरिने प्रतिबद्धता पूरा गर्न सकिने खालको हुनुपर्नेमा उनले जोड दिएका छन्।
उनले धर्म, संस्कृति र आस्थाको संरक्षणसँगै विकासलाई अगाडि बढाउने नीति अपनाइने बताए।
जोशीले जनता आकर्षित गर्न मन्दिर चाहर्ने उम्मेदवार बढी रहेको बताउँदै हिन्दुराष्ट्र भन्न नसक्ने तर मन्दिर चहारेर मत बटुल्ने पक्षमा रहेको आरोप लगाए ।
